Umuvugizi w’Igisirikare cya M23, Willy Ngoma, yatangaje ko uyu Mutwe ugizwe n’abasirikare b’Abanye-Congo baharanira uburenganzira bwabo, yongera gushimangira ko nta bufasha na bumwe uhabwa na Leta y’u Rwanda.
Hashize iminsi itatu M23 itangaje ko iri kugenzura Umujyi wa Goma, nyuma y’imirwano ikomeye yahanganyemo n’Igisirikare cya Congo, FARDC n’indi mitwe bifatanya irimo FDLR na Wazalendo.
Mu bihe bitandukanye, Ubuyobozi bwa Repubulika Iharanira Demokarasi ya Congo bwatangaje ko Umutwe wa M23 ufashwa na Leta y’u Rwanda, ibyo u Rwanda rwo rwamaganira kure kugeza n’uyu munsi.
Nyuma y’uko M23 ifashe Goma, Guverinoma ya Congo yakomeje gushinja u Rwanda kuba inyuma y’ibikorwa byo kuyitera inkunga ndetse ntihwema kubitangariza amahanga n’imiryango mpuzamahanga.
Kuri uyu wa Gatatu, ubwo umunyamakuru wa Sky News, Yousra Elbagir, yari mu kiganiro kigaragaza uko Umujyi wa Goma wifashe nyuma yo gufatwa na M23, yabajije Umuvugizi wa Gisirikare, Willy Ngoma, ibyerekeye ubufasha bahabwa n’u Rwanda.
Yousra yagize ati “Iyo u Rwanda ruza kuba rutari kubafasha, murabona mwari kuba mwafashe Goma?”
Willy Ngoma yamusubije ko M23 igizwe n’abasirikare b’Abanye-Congo ndetse badafite aho bahuriye n’u Rwanda.
Ati “Oya, Oya, Oya. Ibyo si ukuri muvandimwe, mushiki wanjye, turi igisirikare cya Congo, twe turi Abanye-congo. Ntabwo dufashwa n’u Rwanda, rekeraho ibyo uvuga.”
Kuva M23 yafata Goma, yabohoye abashoferi b’ibihugu bya EAC, bari barahejejwe mu Mujyi wa Goma n’intambara.
Sibyo gusa kuko uyu Mutwe wirukanye abacanshuro basaga 290 bakomoka muri Romania bari barazanywe na Leta ya Congo gufasha igisirikare cya FARDC guhangana na yo ndetse banyujijwe mu Rwanda mu rugendo rusubira mu bihugu byabo.
M23 yatangaje ko icyo igambiriye atari ukurwana ahubwo ari ukurengera uburenganzira yambuwe na Leta ya Congo, ndetse ikanga kujya mu biganiro bigamije gushaka igisubizo cy’icyo kibazo.
