Minisitiri w’Intebe Dr. Justin Nsengiyumva yavuze ko uburyo abayobozi n’abakozi ba Leta bakora akazi kabo, kimwe n’indangagaciro zibabaranga, bigira uruhare rukomeye mu buryo abaturage biyumva ndetse n’agaciro bumva bahabwa na Leta yabo.
Yabigarutseho kuri uyu wa Gatanu, mu Karere ka Bugesera, mu gikorwa cyo Kwibuka ku nshuro ya 32 Jenoside yakorewe Abatutsi mu 1994, cyahuriranye no Kwibuka abari abakozi ba Minisiteri y’Ubutabera, Minisiteri y’Abakozi ba Leta n’Umurimo na Minisiteri y’Ibikorwa Remezo n’Ubwikorezi bazize Jenoside.
Mbere yo kwerekeza ku Rwibutso rwa Jenoside rwa Ntarama, Minisitiri w’Intebe n’abakozi bakorera mu nyubako y’Ibiro bya Minisitiri w’Intebe babanje gushyira indabo ku kimenyetso cy’urwibutso rwa Jenoside kiri kuri iyi nyubako.
Iki gikorwa cyitabiriwe n’abaminisitiri, abayobozi b’ibigo bya Leta bikorera muri iyi nyubako ndetse n’imiryango y’abari abakozi b’izo minisiteri bishwe muri Jenoside yakorewe Abatutsi.
Mu ijambo rye, Dr. Nsengiyumva yavuze ko Jenoside yakorewe Abatutsi itabaye impanuka, ahubwo yateguwe ikanashyirwa mu bikorwa n’ubutegetsi bwariho icyo gihe binyuze mu miyoborere mibi n’ibyemezo byafatiwe mu nzego nk’izo abayobozi bakoreramo uyu munsi.
Ati: “Uburyo dukoramo akazi n’indangagaciro zituranga ni byo bigena uko Abanyarwanda biyumva n’uko babona agaciro bahabwa na Leta yabo. Mu gihe tunaniwe gusohoza inshingano zacu twunze ubumwe kandi turangwa n’ubunyangamugayo, havuka icyuho kibyara amacakubiri aganisha kuri Jenoside, nk’uko amateka yacu mabi abitwereka.”
Yasabye abayobozi n’abakozi ba Leta gukomeza kuzirikana inshingano bafite zo gukorera abaturage mu kuri, mu bunyangamugayo no mu bumwe, kugira ngo intego ya “Never Again” ikomeze kuba impamo.
Minisitiri w’Intebe yavuze ko nubwo imyaka 32 ishize Jenoside ihagaritswe, urugamba rwo kurwanya ingengabitekerezo ya Jenoside, ihakana n’ipfobya bya Jenoside yakorewe Abatutsi rugikomeje.
Ati “Haracyari benshi bagerageza kugoreka amateka y’Igihugu cyacu no kubiba amacakubiri mu Banyarwanda. Dusabwa twese rero guhozaho, abakuru n’abato, mu kurinda ukuri no guhangana n’amacakubiri, dukumira buri mugambi mubi ugamije kudusubiza mu mateka y’icuraburindi.”
Yanashimiye Minisiteri y’Ubutabera n’izindi nzego zikomeje gukurikirana abasize bakoze Jenoside yakorewe Abatutsi bagihunga ubutabera hirya no hino ku Isi, abasaba gukomeza gukora uwo murimo umurava.
Dr. Nsengiyumva kandi yashimye ubuhamya bwatanzwe na Murangwayire Liliane, warokotse Jenoside yakorewe Abatutsi, avuga ko ubuhamya nk’ubwo budakwiye gufatwa nk’inkuru zisanzwe ahubwo ko bukwiye kubera isomo buri Munyarwanda.
Ati “Ijoro ribara uwariraye. Natwe abumva ubuhamya nk’ubu ntibugomba kuba amasigaracyicaro ngo tubufate nk’inkuru mbarirano gusa. Dukwiye kubukuramo amasomo atuma twiyemeza gukora ibyo dushoboye byose kugira ngo Jenoside itazongera kubaho ukundi mu Rwanda.”
Mbere yo gusoza, yashimiye Ingabo za FPR-Inkotanyi zari ziyobowe na Perezida Paul Kagame zahagaritse Jenoside yakorewe Abatutsi mu 1994, avuga ko ubutwari n’ubwitange bwazo byabereye Abanyarwanda isoko y’icyizere n’urugero rw’uko urukundo n’ubumwe bishobora gutsinda ingengabitekerezo y’urwango.
Yanihanganishije abarokotse Jenoside yakorewe Abatutsi n’imiryango y’abazize Jenoside, abizeza ko Leta izakomeza kubaba hafi no kubitaho.
Yasoje asaba abakozi bo mu nzego za Leta n’iz’abikorera gukomeza gukora neza, gusigasira ibyo igihugu cyagezeho no kurushaho kubyubakiraho, avuga ko ari bwo buryo bwiza bwo guha icyubahiro no gusubiza agaciro bagenzi babo bazize Jenoside yakorewe Abatutsi.
