Minisiteri y’Uburezi ibinyujije mu kigo cy’Igihugu gishinzwe Ibizamini n’Ubugenzuzi bw’Amashuri (NESA) yatangije ku mugaragaro ibizamini ngiro (Practical Exams) ku bakandida 74,085 basoza ayisumbuye muri uyu mwaka wa 2025/26.
Ibi bizamini bizakorwa kuva kuri uyu wa Gatatu tariki 3 Kamena kugera tariki 22 Kamena 2026, hirya no hino mu Gihugu, bikorerwe ku ma site y’ibizamini 854.
Byitabiriwe n’abakandida barimo 70,504 bari mu mashuri atandukanye na 3,581 bigenga, barimo abiga mu mashuri ya Tekiniki, Imyuga n’Ubumenyingiro, abo mu Mashuri Nderabarezi, Ubuforomo, Icungamutungo n’abiga amasomo ya Siyansi.
Ku rwego rw’Igihugu, ibi bizamini byatangirijwe mu ishuri ry’imyuga n’ubumenyingiro rya Saint Joseph Integrated Technical College riri i Nyamirambo mu Mujyi wa Kigali, ndetse ndetse na Kagarama Secondary School mu Karere ka Kicukiro.
Umunyamabanga wa Leta muri Minisiteri y’Uburezi, Irere Claudette, yibukije ababyeyi, abarezi n’abanyeshuri ko nubwo hatangiye ibi bizamini ngiro, n’ibyanditse byegereje bityo ko bakwiye gukaza imyiteguro.
Ati: “ Abarimu bakomeze bafashe abanyeshuri kwitegura, ababyeyi bafashe abana kugirango hatagira icyo bakenera bakibura. Umwana ntananirwe gukora ikizamini kuko hari ibyo umubyeyi atakoze kandi ari inshingano.”
Yibukije abanyeshurI basoza amashuri yisumbuye kwirinda ibikorwa by’urugomo byangiza ibikorwaremezo n’ibikoresho barumuna babo bari kuzakoresha.
Ati: “Ibyo rwose reka mbisubiremo ntabwo tuzabyihanganira. Umuntu wese agomba kumva inshingano y’uko ibyo akoresheje uyu munsi, barumuna be bazabikoresha. Gusiga ubyangije birahanirwa.”
Yifurije intsinzi abanyeshuri bose bazakora ibizamini muri uyu mwaka w’amashuri wa 2025/26, izabahesha gukomeza no bindi byiciro byisumbuyeho.
