Mu isiganwa ry’amagare rya Cameroon (Tour du Cameourn 2026) ikipe ya Benediction Banafrica Team ihagararaiye u Rwanda ikomeje kwitwara neza kuko yasoje agace ka kabiri iyoboye amakipe ku rutonde rusange.
Aka gace kakinwe kuri uyu wa Kane, tariki ya 4 Kamena 2026, ku ntera y’ibilometero 97,2.
Abanyarwanda bakinira Benediction bose uko ari batanu barimo Masengesho Vainqueur, Nshimiyimana Phocas, Uwiduhaye Mike, Uhiriwe Espoir na Mugisha Moise bose basoje mu gikundi cya mbere.
Iki gikundi cyakoresheje ibihe bingana kuko abakinnyi 27 bose bahagereye rimwe bakoresheje amasaha abiri, iminota 27 n’isegonda rimwe (2:27:01).
Umunya-Algérie, Victoire de Mohamed Assal ni wasoje ku mwanya wa mbere.
Ku rutonde rusange mu duce tubiri tumaze gukinwa, Masengesho Vainqueur ari ku mwanya wa gatatu gusa anganya ibihe n’uwa mbere kuko bose bamaze gukoresha amasaha atanu, iminota 26 n’amasegonda 41 (5:26:41).
Akurikirana na Mugisha Moise uri ku mwanya wa kane, ariko we asigwaho iminota ibiri n’amasegonda atandatu (02:06).
Benediction Banafrica Team bakinira ni yo iyoboye urutonde rusange mu makipe 8 ari gukina iri siganwa, aho imaze gukoresha amasaha 16, iminota 24 n’amasegonda 28 mu duce tubiri tumaze gukinwa, twose tungana n’ibilometero 221,8.
