Amakipe y’Ingabo z’Igihugu ya karate arimo ya APR n’Ikipe ya Karate y’Ingabo zidasanzwe (RDF Special Forces) bifatanyije n’andi makipe atandukanye yo mu Rwanda mu bagabo n’abagore, mu Irushanwa rya Karate ryo Kwibuka ku nshuro ya 32 Jenoside yakorewe Abatutsi mu 199.
Ni irushanwa ryabereye mu Karere ka Karongi ku wa 21 Kamena 2026.
Iri rushanwa ryateguwe n’Ishyirahamwe ry’Umukino wa Karate mu Rwanda, FERWAKA, ryahuje amakipe ya karate aturutse hirya no hino mu bice bitandukanye by’igihugu mu rwego rwo kuzirikana no guha icyubahiro abazize Jenoside yakorewe Abatutsi mu 1994.
Ryabaye kandi umwanya wo gukomeza kwimakaza amahoro, ubumwe n’ubwiyunge binyuze muri siporo.
Mbere y’uko amarushanwa atangira, abanyamuryango b’amakipe yose yari yitabiriye bifatanyije mu bikorwa byo kwibuka, birimo urugendo rwo kwibuka rwakozwe rugana ku Rwibutso rwa Jenoside rwa Rubengera, aharuhukiye mu cyubahiro imibiri y’abazize Jenoside yakorewe Abatutsi 3,439.
Mu marushanwa yabaye, ikipe ya APR mu bagabo yegukanye umwanya wa mbere, naho mu bagore ikipe ya Club Rafiki aba ari yo yegukana umwanya wa mbere.
Umuyobozi w’Akarere ka Karongi Wungirije ushinzwe imibereho myiza y’abaturage,Umuhoza Pascasie, yashimiye urubyiruko, by’umwihariko FERWAKA, uruhare rwabo rw’indashyikirwa mu gukoresha siporo nk’uburyo bwo kwibuka Jenoside yakorewe Abatutsi no gukomeza gushyigikira abayirokotse.
Yabashishikarije gukomeza kurangwa n’imyitwarire myiza n’ikinyabupfura biranga umukino wa karate.
