Minisitiri w’Ububanyi n’Amahanga n’Ubutwererane, Amb. Olivier Nduhungirehe, yakiriye Umugenzuzi Mukuru w’Imari ya Leta wa Mali, Abdul Aziz Aguissa, baganira ku bufatanye mu bijyanye n’imicungire n’imikoreshereze by’umutungo wa leta.
Ni ibiganiro byabaye kuri uyu wa kabiri tariki 23 Kamena 2026.
Aziz Aguissa ari mu Rwanda mu ruzinduko rw’akazi rugamije gusangira ubunararibonye no gushimangira ubufatanye hagati y’ibihugu byombi.
Minisiteri y’Ububanyi n’Amahanga yatangaje ko mu biganiro byahuje aba bayobozi bombi byibanze ku buryo bwo gukomeza guteza imbere imikoranire hagati y’inzego zishinzwe ubugenzezi n’imikoreshereze by’umutungo wa Leta, hagamijwe kongerera ubushobozi ibigo by’imari.
Impande zombi zagarutse ku kamaro ko gukomeza guhanahana ubumenyi n’ubunararibonye mu rwego rw’ubugenzuzi bw’imari n’umutungo bya Leta, nk’imwe mu nzira zifasha guteza imbere gukorera mu mucyo, kubazwa inshingano no kurwanya imikoreshereze mibi y’umutungo wa leta.
Abdul Aziz Aguissa ari mu Rwanda mu ruzinduko rw’akazi rugamije kungurana ibitekerezo n’ibigo bitandukanye bya Leta, by’umwihariko, Ibiro by’Umugenzuzi Mukuru w’Imari ya Leta mu Rwanda, n’ibindi bigo byegamiye kuri leta.
Umubano w’u Rwanda na Mali uhagaze neza aho ushingiye ku bufatanye mu nzego zirimo; politiki, umutekano, iterambere, n’imari. Ibihugu byombi bikomeje gushimangira umubano wabyo binyuze mu masezerano atandukanye.
Mu mpera za Gicurasi 2024, u Rwanda na Mali byasinyanye amasezerano 19 y’ubufatanye mu nama ya mbere ya Komisiyo Ihuriweho yabereye i Kigali.
