Mu gihe imirwano ikomeje kubica mu Burasirazuba bwa Repubulika Iharanira Demukarasi ya Congo (RDC), ihuriro Alliance Fleuve Congo (AFC/M23) ryatangaje ko ridateze kuva ku butaka bw’iki gihugu, rivuga ko abarigize ari abanyekongo bafite uburenganzira busesuye ku gihugu cyabo nk’ubw’abandi baturage bose.
Mu itangazo ryashyizwe ahagaragara mu mpera z’icyumweru gishize, AFC/M23 yavuze ko amateka ya RDC agaragaza ko abaturage bafite inkomoko ku butaka bwabo badashobora kubwirwa ko igihugu atari icyabo cyangwa ngo bahatirwe kukivamo kubera impamvu za politiki.
Iri huriro ryasobanuye ko kuva ku Bwami bwa Kongo kugeza kuri Repubulika Iharanira Demokarasi ya Congo yubu, abaturage bakomeje kubungabunga amateka wabo, umuco wabo n’isano bafitanye n’igihugu cyabo, nubwo rivuga ko ubutegetsi bwagiye busimburana bwakomeje kwibasira amwe mu moko.
AFC/M23 ivuga ko ikibazo cya Congo kidakwiye gukemurwa binyuze mu guheza abaturage bamwe cyangwa kubambura uburenganzira bwabo, ahubwo ko gikwiye gushingira ku bwubahane, uburinganire no ku bwenegihugu busesuye bw’abaturage bose.
Mu butumwa bwayo, AFC/M23 yagarutse cyane ku bibera mu Minembwe, ivuga ko abaturage baho bakomeje kwihanganira ibihe bikomeye by’intambara n’ibikorwa by’urugomo, ariko bakanga kuva ku butaka bwabo cyangwa gutakaza icyizere cy’ejo hazaza.
Iri huriro rivuga ko abaturage bo mu misozi ya Minembwe bakomeje kugaragaza ubushake bwo kubaho no kurinda amateka yabo n’uburenganzira bwabo, nubwo rivuga ko bamaze igihe bahura n’ivangura, ihezwa n’ibikorwa by’urugomo bibibasira.
AFC/M23 yongeye gushimangira ko abaturage bafite ubumwe n’umubano ukomeye n’ubutaka bwabo badashobora gusibwa mu mateka cyangwa gukurwa mu gihugu cyabo binyuze ku mbaraga za gisirikare.
Mu itangazo ryayo, iri huriro ryongeye gushinja ubutegetsi bwa Perezida Félix Tshisekedi gukorana n’imitwe yitwaje intwaro irimo FDLR, Wazalendo ndetse n’abacanshuro b’abanyamahanga, rivuga ko iyo mitwe ikoreshwa mu bikorwa byibasira abaturage bo mu Burasirazuba bwa RDC.
AFC/M23 ivuga ko gukomeza gukoresha iyo mitwe no guheza abaturage bamwe bishobora gukomeza guteza umwuka mubi no kongera amakimbirane aho kuyakemura.
AFC/M23 yavuze ko amahoro arambye muri Repubulika Iharanira Demokarasi ya Congo atazagerwaho binyuze mu gitugu cyangwa mu guheza abaturage bazira inkomoko yabo, ahubwo ko azashingira ku kubahiriza uburenganzira bwa muntu, kurinda abasivili no guha abaturage bose amahirwe angana imbere y’amategeko.
Iri huriro ryavuze kandi ko abaturage bo mu Burasirazuba bwa RDC bazakomeza gufata igihugu cyabo nk’umurage wabo kandi ko badateze kwemera kuvutswa ubwenegihugu cyangwa uburenganzira bwabo bwo kubaho mu mutekano no mu cyubahiro.
