Minisiteri y’Ibikorwaremezo yatangaje ko imirimo yo kwagura no kongerera ubushobozi uruganda rutunganya amazi rwa Mutobo iri kugana ku musozo, aho igeze kuri 97%.
Icyiciro cya mbere cy’uyu mushinga kizongera ubushobozi bw’uruganda ho meterokibe 43,000 z’amazi ku munsi. Izi ziziyongera kuri meterokibe 12,500 uru ruganda rwubatswe mu 1987 rwari rusanzwe rutanga ku munsi zikaba meterokibe ibihumbi 55.500 ku munsi.
Uru ruganda rw’amazi rwa Mutobo rwubatswe mu Murenge wa Gataraga mu Kagari ba Rubindi.
Uyu mushinga uzongera ingano y’amazi meza ku baturage barenga 354,000 bo mu Turere twa Musanze na Burera no muri imwe mu Mirenge yo mu Turere twa Nyabihu na Rubavu.
Uru ruganda rwari rusanzwe ruha amazi abaturage bo mu mirenge itanu ya Burera ndetse n’abandi bo mu mirenge 11 yo mu Karere ka Musanze mu gihe nirwuzura ruzatanga amazi meza mu mirenge ine yari isigaye yo muri Musanze runayageze mu turere twa Nyabihu na Rubavu.
Kuvugurura uru ruganda no kurusana bizatwara miliyari 14 Frw aho hubatswe ibikorwaremezo bitandukanye birimo uruganda rushya, kubaka ibigega 40 by’amazi mu turere twa Musanze, Nyabihu na Rubavu n’imashini enye zizamura amazi n’amavomo rusange 135 n’ibindi.
Uruganda rw’amazi rwa Mutobo rukoresha amasoko abiri arimo isoko ya Rubindi n’isoko ya Mutobo atuma haboneka meterokibe ibihumbi 55 bizajya bikwirakwizwa mu turere dutatu
Buri kwezi uru ruganda rw’amazi ruzajya rukoresha umuriro w’amashanyarazi wa miliyoni 30 Frw mu gusunika amazi kugira ngo agere ku baturage.
Uru ruganda ruzatanga meterokibe ibihumbi 55.500 ku munsi
