Ikipe ya Vipers SC yo muri Uganda yatangiye neza mu mikino ya CECAFA Kagame Cup 2026 itsinda Garde Républicaine FC yo muri Djibouti ibitego 3-0 mu mukino muri Sitade Amahoro.
Kuri uyu wa Gatanu tariki 24 Nyakanga 2026, saa cyenda z’umugoroba (15h0), nibwo hakinwe umukino wabimburiye indi yo mu irushanwa rya CECAFA Kagame Cup 2026 iri kubera mu Rwanda kugeza tariki 7 Kanama 2026.
Uyu mukino wo mu itsinda rya mbere wahuje Vipers SC yo muri Uganda na Garde Républicaine FC yo muri Djibouti, warangiye Vipers SC yitwaye neza itsinda ibitego 3-0 byose byabonetse mu gice cya mbere.
Vipers SC yabonye igitego cya mbere ku munota wa 16 kuri kufura yatsinzwe neza na Farouk Miya uherutse kongera gusinyira iyi kipe ayisubiramo, yaherukaga gukinira muri 2016.
Farouk Miya yongeye gutsinda igitego cya kabiri muri uyu mukino ku munota wa 39 mbere y’uko Abdul Karim Watambala asobyamo igitego cya 3 cya Vipers SC mu minota y’inyongera y’igice cya mbere.
Ibi bitego bitatu byo mu gice cya mbere byose ni nabyo byatandukanye impande zombi muri uyu mukino.
Undi mukino wo muri iri tsinda ni uwa APR FC yo mu Rwanda na Gor Mahia FC yo muri Kenya.
Mbere y’uko uyu mukino urangira, Vipers SC niyo iyoboye itsinda n’amanota 3, yizigamye ibitego 3.
Mu mikino ya kabiri yo muri iri tsinda, Garde Républicaine FC izakina na APR FC tariki 27 Nyakanga 2026 saa kumi n’ebyiri z’umugoroba, naho Gor Mahia FC ikine na Vipers SC saa cyenda z’umugoroba, iyi mikino yombi izabera muri Kigali Pele Stadium.
