Urwego Rushinzwe gutegura Shampiyona y’u Rwanda, Rwanda Premier League, rwashyize ahagaragara uko amakipe azahura muri Shampiyona y’icyiciro cya mbere mu Rwanda, BK Pro League 2026/27, izatangira tariki 4 Nzeri 2026 igasozwa tariki 30 Gicurasi 2027.
Amakipe 18 niyo azongera agakina iyi shampiyona harimo amakipe 16 yo mu Rwanda n’abiri yo muri Sudani ariyo Al Hilal na Al Merrikh.
Ku munsi wa mbere wa shampiyona, Kiyovu Sports izakira Gorilla FC saa 15:00 kuri Kigali Pele Stadium tariki 4 Nzeri 2026, bukeye bwaho Amagaju FC azakira Etoile de l’Est kuri Sitade Kamena, Etincelles FC yakire Sunrise FC kuri Sitade Umuganda, imikino yombi izatangira saa 15:00.
Ku Cyumweru tariki 6 Nzeri 2026, imikino y’umunsi wa mbere izakomeza yose itangira saa 15:00 aho Marine FC izakira Kigali FC kuri Sitade Umuganda, Mukura VS&L yakira Gasogi United kuri Sitade Kamena naho umunsi uzakurikiraho Police FC izakira Gicumbi FC kuri Kigali Pele Stadium saa 15:00.
Imikino 3 izagirwa ibirarane kubera ko amakipe ya Rayon Sports, Al Merrikh SC, Al Hilal SC na APR FC azaba ari mu mikino y’ijonjora ry’ibanze muri CAF Confederation Cup na CAF Champions League.
Imikino izasubikwa ni uwagombaga guhuza Rayon Sports na Al Merrikh, Bugesera FC na Al Hilal SC n’umukino wa APR FC na Musanze FC.
Umukino uba utegerejwe na benshi uhuza Rayon Sports na APR FC uzakinwa tariki 21 Ugushyingo 2026 kuri Sitade Amahoro ku munsi wa 9 wa BK Pro League aho Rayon Sports izaba yakiriye naho umukino wo kwishyura nturashyirirwaho igihe nyacyo uzaberaho.
