APR FC yatsinze Al Merreikh SC ibitego 3-0 mu mukino wa gicuti wabereye kuri Kigali Pelé Stadium ku mugoroba wo kuri uyu wa Mbere, tariki ya 17 Kanama 2026.
Umukino watangiye saa 18:00, aho APR FC yari yakiriye Al Merreikh SC yo muri Sudani mu rwego rwo gukomeza imyiteguro y’umwaka w’imikino wa 2026/27.
Umutoza Taleb Abderrahim wa APR FC wari umwanya we wo kwisubiraho nyuma yo gutsindwa na Sunrise FC igitego 1-0 mu mukino wa gicuti uheruka, kimwe n’uko byari bimeze ku mutoza Darko Novic wa Al Merrikh nawe watakaje umukino uheruka wa gicuti yatsinzwemo na Gicumbi FC igitego 1-0.
APR FC yagaragaje imbaraga mu busatirizi, iza kubona ibitego bitatu byayihesheje intsinzi byatsinzwe na Amani Kouadiokan Michel Breygeneve, Byiringiro Jean Gilbert na Uwiyeremye Fideli.
Amani yongeye kwitwara neza nyuma yo gutanga imipira ibiri yavuyemo ibitego mu mukino wa gicuti APR FC yatsinzemo Etincelles ibitego 2-1, ndetse na Uwiyaremye Fidali wari watsinze igitego kuri uwo mukino yongeye kunyeganyeza inshundura.
Umukino waherukaga guhuza aya makipe n’ubundi warangiye APR FC itsinze Al Merreikh ibitego 2-1 muri Shampiyona y’u Rwanda BK Pro League.
Bitaganyijwe ko APR na Al Merreikh zizongera guhurira muri Shampiyona ku munsi wa 14 uzakinwa tariki 19 Ukuboza 2026 muri Kigali Pele Stadium.
APR FC ikomeje gukina imikino ya gicuti myinshi mu rwego rwo kwitegura umwaka utaha w’imikino uhereye ku mikino y’ijonjora ya CAF Champions League aho mu ijonora rya mbere izahura na Aigles du Congo.
Al Merrikh nayo ntabwo urugamba ruyoroheye kuko nyuma yo gutwara igikombe cya Shampiyona ya Sudani izahagararira iki gihugu mu mikino ya CAF Champions League aho mu ijonjora rya mbere izahura na Power Dynamos yo muri Zambia.
