Ikipe ya AEK Athens FC yo mu Bugereki ikinamo Umunyarwanda Hakim Sahabo yabonye itike ya UEFA Champions League nyuma yo gusezerera PFC Levski Sofia yo muri Bulgaria ku giteranyo cy’ibitego 4-0.
Kuri uyu wa Gatatu tariki 25 Kanama 2026 nibwo AEK Athens FC yakiriye PFC Levski Sofia mu mukino wo kwishyura w’ijonjora rya nyuma ry’igikombe gihuza amakipe yabaye aya mbere iwayo ku mugabe w’i Burayi, UEFA Champions League.
Umukino ubanza wari warangiye amakipe yombi aguye miswi ya 0-0, bivuze ko ikipe yari kwitwara neza kuri uyu mukino wo kwishyura wabereye muri Allwyn Arena yari guhita ibona itike.
AEK Athens FC yari imbere y’abafana bayo yabashije kwitwara neza itsinda PFC Levski Sofia ibitego 4-0 biyihesha kubona itike yo kuzakina imikino ya nyuma ya UEFA Champions League.
Hakim Sahabo ukina mu kibuga hagati unakinira ikipe y’igihugu y’u Rwanda “Amavubi” n’ubwo atagaragaye muri iyi mikino yombi ariko ikipe ye yongeye kubona itike ya UEFA Champions League yaherukaga gukina muri 2018/19.
Hakim Sahabo abaye umunyarwanda wa kabiri mu mateka ugiye gukina UEFA Champions League nyuma ya Joy-Lance Mickels wateye iyi ntambwe hamwe n’ikipe ye ya Sabah FK yo muri Azerbaijan.
