Mu Karere ka Gucumbi hatashywe ibikorwaremezo by’uburezi birimo ibyumba by’amashuri, ibyumba by’isuku y’umukobwa na laboratwari bikaba byaruzuye bitwaye amafaranga asaga miliyari 7,4 Frw.
Ni ibyumba by’amashuri 963 birimo iby’isuku y’umukobwa n’ibindi biri mu bigo 25 bishya byahanzwe, amacumbi y’abanyeshuri, za laboratwari zigezweho ndetse n’amasomero byubatswe ku nkunga ya Banki y’Isi kuva mu 2020.
Byubatswe muri gahunda izwi nka ‘Quality Basic Education for Human Capital Development Project’, Minisiteri y’Uburezi ifatanyamo na Banki y’Isi.
Iyi gahunda igamije kongera ireme ry’uburezi, guteza imbere ubushobozi bw’abarezi, gufasha abanyeshuri gukomeza kwiga, no gushyiraho ahantu hizewe kandi hanini ho kwigira.
Abarezi bavuga ko gushyikirizwa ibi bikorwaremezo byabafashije kunoza imyigire y’abana na kwita ku isuku y’abakobwa.
Umuyobozi w’Akarere ka Gicumbi, Emmanuel Nzabonimpa, ahamya ko ibi bikorwaremezo byatumye abana bajyaga kwiga kure babona uko biga biboroheye, bikagabanya ubucucike kandi bigakundisha abana kwiga amasomo ya siyansi kandi bagatsinda neza.
Yagize ati “Haba ubucucike mu mashuri, haba izo ngendo zakorwaga n’abana bajya kwiga, n’abatari bafite aho barara abo bose barasubijwe.”
Umuyobozi Mukuru wungirije w’Ikigo gishinzwe Guteza imbere uburezi, (REB) Mutezinka Flora, yavuze ko gahunda yo kubaka ibi bikorwaremezo yitaweho mu rwego rwo kugaragariza abafatanyabikorwa ko imbaraga bashyiramo zitapfuye ubusa.
Ubufatanye bwa Minisiteri y’Uburezi na Banki y’Isi mu kubaka ibikorwaremezo by’amashuri kuva mu 2019, byatanze umusaruro ufatika.
M mwaka ushize wa 2025 hubatswa ibyumba by’amashuri birenga 11,000 n’ubwiherero 14,680 mu gihugu hose, bifasha kugabanya ubucucike mu mashuri no korohereza abanyeshuri kugerwaho n’uburezi, cyane cyane mu bice by’icyaro.
MINEDUC ivuga ko izi ntambwe zigaragaza uburyo igihugu kiri gushyira imbere ireme ry’uburezi, gukomeza imyigire y’abanyeshuri no guteza imbere ubushobozi bw’abarezi.
