Umutoza wa Rayon Sports, Haringingo Francis Christian, yatangaje ko yizeye ko ikipe ye itsinda Black Bulls yo muri Mozambique, mu mukino ubanza w’ijonjora rya kabiri rya CAF Confederation Cup, uraba kuri uyu wa Gatandatu, tariki ya 17 Ukwakira 2026.
Uyu mukino urabera kuri Stade Amahoro i Remera, aaa Kumi n’Ebyiri z’umugoroba (18:00).
Mu kiganiro n’itangazamakuru cyabaye kuri uyu wa Gatanu, Haringingo yavuze ko nubwo umukino utaraba woroshye, yizeye ubushobozi bw’abakinnyi be kandi ko biteguye guhangana n’iyi kipe yo muri Mozambique.
Ati: “Ni umukino dufitiye icyizere, turi gukinira mu rugo. Urebye muri rusange uko abakinnyi biteguye, twiteguye neza, ku ruhande rwacu tumeze neza, twiteguye umukino.”
Haringingo yanatangaje ko abakinnyi bose ba Rayon Sports bameze neza, harimo n’abo ikipe itari ifite mu mikino y’ijonjora rya mbere rya CAF Confederation Cup.
Yavuze ko kuba abakinnyi bose bahari bizamuha amahitamo menshi, haba mu gushyira mu kibuga abakinnyi babanzamo ndetse no mu gusimbuza mu gihe mu mukino uzaba uri kuba.
Ati: “Imikino twakinnye ntabwo twari dufite amahitamo menshi, hari abakinnyi tutari dufite. Ubu urebye ubu dufite ibisubizo haba mu bakinnyi babanzamo ndetse n’abasimbura.”
Rayon Sports igiye muri uyu mukino nyuma y’iminsi itayoroheye muri shampiyona y’u Rwanda, aho iheruka gutsindwa na Gorilla FC igitego 1-0 mu mukino w’umunsi wa kane wa BK Pro League, wakinwe ku wa 9 Ukwakira 2026.
Mbere y’uyu mukino, iyi kipe yari yanganyije na Sunrise FC igitego 1-1 mu mukino wa shampiyona wabaye ku wa 17 Nzeri 2026, mu gihe yananganyije na Gicumbi FC ubusa ku busa mu mukino wa gicuti wabereye i Gicumbi ku wa 3 Ukwakira 2026.
Mu mikino ya CAF Confederation Cup, Rayon Sports yageze muri iri jonjora rya kabiri isezereye Panthère Sportive du Ndé yo muri Cameroun. Umukino ubanza wabereye muri Cameroun warangiye amakipe yombi anganyije igitego 1-1, naho uwo kwishyura wabereye i Kigali urangira ari ubusa ku busa, bituma Rayon Sports ikomeza ku bw’igitego yatsindiye hanze.
Black Bulls yo muri Mozambique na Rayon Sports zirahatanira itike yo gukina imikino y’amatsinda ya CAF Confederation Cup iyi kipe yambara ubururu n’umweru iherukamo mu 2018. Umukino ubanza uzabera i Kigali, mu gihe uwo kwishyura uteganyijwe muri Mozambique ku wa 24 Ukwakira 2026
