Minisitiri w’Ubuzima, Dr. Sabin Nsanzimana, yasabye Abanyarwanda guha agaciro ibibafasha gutera imbere aho guha inzoga umwanya ukomeye mu buzima bwabo, ashimangira ko urubyiruko rukwiye kubaka igihugu rufite ubuzima bwiza, ubwenge bukora neza n’inzozi zerekeza ku iterambere.
Byagarutseho ku wa 21 Ukwakira 2026, mu Biganiro Youth Meet The President, cyahurije hamwe urubyiruko rugera ku bihumbi 10 na Perezida wa Repubulika, Paul Kagame, hagamijwe kuganira ku bibazo byugarije urubyiruko.
Mu butumwa yagejeje ku rubyiruko, Minisitiri Nsanzimana yagaragaje ko inzoga n’ibiyobyabwenge biri mu bidindiza inzozi z’urubyiruko, asaba Abanyarwanda guhindura imyumvire no gutesha inzoga agaciro.
Yagize ati: “Inzoga zahawe agaciro kadakwiriye mu muco wacu no mu muryango Nyarwanda. Tugomba kuzambura ako gaciro tugaha agaciro ibikwiriye.”
Yasobanuye ko inzoga zigira ingaruka ku mikorere y’ubwonko, bikaba bishobora gutuma umuntu afata ibyemezo bidahwitse, agakora ibikorwa atari asanzwe akora ndetse bikagira ingaruka ku mibanire ye n’abandi.
Ati: “Ibyemezo wari gufata uri muzima bigahinduka, utavugaga agasakuza, utarwanaga agatangira gukubita n’abamubyaye, umugore agakubita umugabo. Reka inzoga tuziteshe agaciro. Buri musinzi aho ari hose, haba uwo mu cyaro cyangwa uwo mu mujyi, ako gaciro twahaye inzoga tuzikambure.”
Minisitiri Nsanzimana yasabye urubyiruko kugira inzozi, zikazivamo intego, izo ntego na zo zigashyirwa mu bikorwa binyuze muri gahunda zifatika. Yagaragaje ko iyo umuntu adafite ibyo bintu bitatu, bigorana ko agera ku byo yifuza.
Yagize ati: “Twese twabaye bato, tuba dufite indoto, indoto zikavamo intego, intego na yo ikavamo gahunda. Iyo ibyo bintu bitatu ubibuze, urarota, ukaryama bugacya ugakanguka.”
Yashimangiye ko kugira ngo urubyiruko rugire uruhare mu iterambere ry’igihugu, rukwiye kurangwa n’ubuzima bwiza, ubwenge butekereza neza n’imyitwarire irufasha kugera ku ntego zarwo.
Ati: “Iyo uri tayari mu bwonko no ku mubiri utera imbere, kandi igihugu ni twese, ntabwo igihugu ari abayobozi. Umubiri mwiza ni ukugirira igihugu akamaro, kandi kuwangiza ni ukwangiriza igihugu.”
Yongeyeho ko kwirinda inzoga n’ibiyobyabwenge ari imwe mu nzira zafasha urubyiruko kubungabunga ubuzima bwarwo no kugera ku nzozi zarwo, asaba Abanyarwanda bose kugira uruhare mu guhindura imyumvire ku ikoreshwa ry’inzoga.
Ubutumwa bwa Minisitiri Nsanzimana bwibanze ku guhamagarira urubyiruko n’abandi Banyarwanda guhitamo ubuzima buzira ibiyobyabwenge, kugira ngo bubake igihugu bafite intego, ubushobozi n’ubuzima bubafasha gutanga umusanzu mu iterambere ryacyo.
