Kaminuza y’u Rwanda yashyize ku isoko ry’umurimo abanyeshuri 4,953 barangije amasomo mu mashami atandukanye muri koleji 8 zigize iyi Kaminuza.
Umuhango wo gutanga impamyabumenyi kuri abo banyeshuri ubaye ku nshuro ya 12, wabereye mu Ishami rya Kaminuza y’u Rwanda rya Rukara riri mu Karere ka Kayonza, kuri uyu wa Gatanu tariki 23 Ukwakira 2026.
Ni ibirori byitabiriwe na Minisitiri w’Uburezi, Joseph Nsengimana nk’umushyitsi mukuru, ari kumwe n’abandi bayobozi mu nzego zitandukanye.
Abahawe impamyabumenyi, barimo abakobwa 1,917. n’abahungu 3, 036. Abanyeshuri 3,480 bahawe impamyabumenyi z’icyiciro cya Kabiri cya Kaminuza (Bachelor’s Degree), 302 bahabwa iz’icya mbere (Advanced Diploma).
Ni mu gihe 1,086 bahawe impamyabumenyi z’icyiciro cya Gatatu cya Kaminuza (master’s degree) abandi 49 bahabwa impamyabumenyi z’ikirenga (PhD).
Umubare w’abanyeshuri bahawe impamyabumenyi na Kaminuza y’u Rwanda, kuri iyi nshuro wagabanyutseho 48% ugereranyije n’abanyeshuri 9,526 barangije mu mwaka wabanje wa 2025.
Umuyobozi wungirije wa Kaminuza y’u Rwanda, Dr. Raymond Ndikumana, yavuze ko iri gabanuka ryatewe n’ivugururwa ry’amasomo ryatumye zimwe muri porogaramu zarangiraga mu myaka itatu zongerwa zikagezwa ku myaka ine.
Ni icyemezo cyatangiye gushyirwa mu bikorwa mu mwaka w’amashuri wa 2022–2023, kigamije guhuza igihe amasomo ya kaminuza amara kikaba imyaka ine.
Icyakora, Dr. Ndikumana yavuze ko UR iteganya ko umubare w’abanyeshuri barangiza uziyongera mu mwaka utaha wa 2027, ubwo abanyeshuri batangiye kwiga muri porogaramu nshya z’imyaka ine bazaba barangije amasomo yabo. Biteganyijwe ko uyu mubare ushobora kuzagera ku bihumbi 12.
Ati: “Umwaka utaha, abazaba barangiza muri izi porogaramu nshya z’imyaka ine bazaba barangije, kandi biteganyijwe ko umubare wabo uzarenga uwo twari dusanzwe tubona mu myaka yabanje.”
Nubwo muri rusange umubare wagabanutse, abahawe impamyabumenyi y’icyiciro cya Gatatu (Master’s Degree), biyongereyeho 51% bava kuri 773 mu 2025 bagera kuri 1,170 mu 2026. Ni mu gihe abarangije PhD, bageze kuri 49 bavuye kuri 35 bayihawe mu 2025.
Abasoje amasomo bize amashami atandukanye abarizwa muri koleji 7 za Kaminuza y’u Rwanda zirimo Koleji y’Uburezi (CE), iy’Ubumenyi n’Ikoranabuhanga (CST), iy’Ubugeni, Indimi n’Ubumenyi bw’Imibereho y’Abaturage (CASS), Koleji y’Ubucuruzi n’Ubukungu (CBE), iy’Ubuvuzi n’Ubumenyi mu by’Ubuzima (CMHS), Koleji y’Ubuhinzi, Amashyamba n’Ubumenyi mu by’Ibiryo (CAFF / CAVM), ndetse n’iy’Ubuvuzi n’Ubumenyi bw’Amatungo (CVAS).
