Ababyeyi ba Miss Nishimwe Naomie n’ababyeyi ba Micheal Tesfay bakoze ubukwe, bashimiye abana babo bakundanye ndetse bakitwara neza kugeza ubwo babahesheje ishema bagakora ubukwe.
Ubukwe bwa Naomie wabaye Miss Rwanda 2020 n’umukunzi we Tesfay bwabaye kuri iki Cyumweru, tariki ya 29 Ukuboza 2024, mu Intare Conference Arena, basezeranywa na Apotre Mignone, Umuyobozi wa Women Foundation Ministries.
Mu mwanya wo kwiyakira abageni baserutse mu muco wo muri Ethiopia ari naho Micheal Tesfay akomoka, barabyina barizihizwa, ndetse ababyeyi bafata ijambo bashimira abana babo babahesheje ishema.
Umubyeyi wa Miss Naomie yamushimye ndetse agaragariza Tesfay ko atwaye umukobwa mwiza uzamumara irungu, ati” Nishimwe Naomie ni inshuti yanjye by’umwihariko, ni umumararungu, Michael nta rungu uzagira mu rugo iwawe, Naomie tuzagukumbura. Hanyuma Tesfay uzamufate neza kuko Naomie aragukunda.”
Umubyeyi wa Tesfay nawe yashimiye umuhungu we witwaye neza akaba amuhesheje ishema, ndetse aha ikaze Miss Naomie winjiye mu muryango wabo arahamushimira.
Micheal Tesfay nawe yashimiye ababyeyi ba Miss Naomie bamuhaye umwana wabo ndetse abizeza kumufata neza, aboneraho gushimira Apotre Mignone wabasezeranyije, ababyeyi be n’abandi.
Ubukwe bwa Miss Naomie na Tesfay bwitabiriwe n’ibyamamare bitandukanye birimo abakobwa babaye ba Nyaminga b’u Rwanda mu bihe bitandukanye, abanyamakuru, abahanzi n’abandi.
