Inteko Rusange y’Abadepite yemeje umushinga w’itegeko rishya rigenga serivisi z’ubuvuzi ryemerera abangavu b’imyaka 15 kuzamura, kuboneza urubyaro.
Ku wa gatatu, tariki ya 5 Ugushyingo 2024, Minisitiri w’Ubuzima Dr. Sabin Nsanzimana yagejeje ku Nteko Rusange y’Abadepite, umushinga w’Itegeko rishya rigena serivisi z’ubuvuzi, ririmo kwemerera ingimbi n’abangavu kwifatira ibyemezo bijyanye n’ubuzima bw’imyororokere.
Muri iri tegeko Minisitiri w’Ubuzima, Dr Nsanzimana Sabin agaragaza ko kumanura imyaka yo kuboneza urubyaro ikagera kuri 15, aricyo gisubizo cyo kugabanya ingaruka zituruka ku nda zitateganyijwe ziterwa abangavu, nka kimwe mu bibazo byibasiye abakiri bato muri iki gihe.
Minisitiri Nsanzimana yagaragaje ko ubushakashatsi bwakozwe bwagaragaje ko mu mezi 12 ashize, abangavu batujuje imyaka 18 batewe inda zitateganyijwe bageze ku 8000, ndetse 70% y’abana bapfa bavuka ari ababyawe n’aba bangavu, bituruka ku kuba imibiri yabo iba itarakura ngo ibashe gukurikirana iki gikorwa.
Inteko Rusange y’Abadepite yemeje ishingiro ry’iri tegeko ivuga ko rijyiye kwigwaho n’ababishinzwe mbere y’uko ryemezwa rigatangira gushyirwa mu bikorwa.
Itegeko ry’ubuvuzi ryerekeye ubuzima bw’imyororokere ryashyizweho ku 20 Gicurasi 2016, rivuga ko umuntu wese wujuje imyaka y’ubukure afite uburenganzira bwo guhabwa ubuvuzi ndetse n’inyigisho bijyanye n’ubuzima bw’imyororokere hatabayeho ivangura iryariryo ryose.
Ibi biheza abangavu n’ingimbi babuzwa uburenganzira bwo gufata ibyemezo bireba ubuzima bwabo bw’imyororokere kubera ko batujuje imyaka y’ubukure ariyo 18, ndetse kuba batabasha kugerwaho n’aya makuru ndetse n’uburyo bwo kuboneza urubyaro bituma haba izamuka ry’inda zitateganyijwe.
