Umuyobozi w’Ihuriro Nyarwanda ry’Abatumiza Ibinyabiziga by’Amashanyarazi, Rukutana Donald Kabanda, yagiriye inama abakoresha imodoka za ‘Hybrid’, kujya bazigura ari nshya, mu rwego rwo kwirinda ibibazo bya bateri zihita zipfa, bikarangira bakoresha moteri ya lisansi.
Abakoresha izi modoka z’amashanyarazi ariko zinasimburanya na lisansi zizwi nka ‘Hybrid’, bagaragaza ko zikunze kugira ibibazo bya bateri zipfa vuba kandi kuzisimbuza bihenze, bigatuma bakoresha lisansi nyamara ari byo Leta y’u Rwanda iri kurwanya mu kugabanya imyuka yangiza ikirere.
Ni ibigarukwaho na bamwe mu bakoresha Hybrid mu Mujyi wa Kigali, bagaragaza ko bagorwa no kongera gusimbuza bateri ziba zarapfuye nyuma y’igihe gito bazikoresha, bituma birangira bari gukoresha lisansi.
Umwe mu bakanishi bakorera izi modoka muri ATECAR, Muhirwa Jean Felix, yabwiye RBA ko ikibazo izi modoka zihura na cyo ari uko usanga bateri zazo ziza zishaje, izindi zibura igihe gito ngo zirangize igihe cy’ubuzima zahawe.
Umuyobozi w’Ihuriro Nyarwanda ry’Abatumiza Ibinyabiziga by’Amashanyarazi, Rukutana Donald Kabanda, yasabye abakoresha izi modoka kujya bazitumiza ari nshya kugira ngo birinde ibyo bibazo.
Ati “Igisubizo cyaba ari ukugura inshya, byibuze ukavuga uti imodoka iri munsi y’imyaka itanu, uba uvuga uti iracyafite ubuzima, uri buyikoreshe mu Rwanda byibura igihe runaka gifatika hejuru y’imyaka 10. Ariko uyu munsi iyo uguze ishaje uba uvuga uti ubuzima bwayo bwatangiye kwangirika icyo gihe ugasanga biteje ikibazo.”
Impuguke mu Bidukikije, Dr. Maniragaba Abias, yasabye ko hari icyakorwa kugira ngo imodoka za ‘Hybrid’ zinjizwa mu gihugu zikore mu buryo zashyiriweho bwo kurwanya imyuka ihumanya ikirere, cyane ko ziba zarasonewe imisoro myinshi zitezweho umusaruro.
Mu 2021 ni bwo Leta y’u Rwanda yagabanyije umusoro wa 5%, ku modoka z’amashanyarazi zinjizwa kuri za gasutamo ndetse n’ibindi bikoresho bigendanye na zo birimo ibyuma bisimbuzwa, ibikoresho bya sitasiyo zazo n’ibindi. Izi ngamba zafashwe ndetse zubahirizwa mu cyerekezo cy’u Rwanda rwifuza ko mu 2030, ruzaba rwaragabanyije 38% y’imyuka yangiza ikirere.
