Abakozi ba Loni n’imiryango yabo baturutse mu Burasirazuba bwa Repubulika Iharanira Demokarasi ya Congo, bageze mu Mujyi wa Kigali, aho bacumbikiwe mu mahoteli atandukanye.
Ku gicamunsi cyo kuri uyu wa Mbere, tariki ya 27 Mutarama 2025, ni bwo aba bakozi b’Umuryango w’Abibumbye bakiriwe kuri Kigali Pelé Stadium, aho biteganyijwe ko bazava berekeza i Kinshasa.
Abageze i Kigali babarirwa mu barenga 600 ni icyiciro cya mbere cyageze mu Rwanda, giturutse mu Mujyi wa Gisenyi, mu Karere Ka Rubavu.
Basesekaye mu Rwanda mu gitondo cyo kuri uyu wa Mbere, baturutse mu Mujyi wa Goma, muri RDC, ahari kubera imirwano ikomeye hagati ya M23 n’Igisirikare cya FARDC n’indi mitwe irimo Wazalendo na FDLR ikorana na yo.
Iyi miryango yavuye i Goma, nyuma y’amabwiriza yatanzwe na Loni, avuga ko abakozi bayo bari muri uyu mujyi, badakenewe cyane, bawusohokamo berekeza mu Rwanda.
Bakoresheje inzira yo mu Rwanda nk’inzira imwe basaga n’aho basigaranye, cyane ko inzira y’ikirere n’iy’amazi byafunzwe guhera ku Cyumweru na M23.
Aba bakozi ba Loni n’imiryango yabo bahawe na Leta y’u Rwanda bisi zibageza mu Mujyi wa Kigali, babwiwe ko bari burare muri hoteli aho ibyo bari burye n’aho kurara byitabwaho na Loni.
Biteganyijwe ko ku wa Kabiri ari bwo abakozi ba Loni baraye mu Mujyi wa Kigali bazafata indege yerekeza mu Mujyi wa Kinshasa.
