Abarokotse Jenoside yakorewe Abatutsi, bo mu Karere ka Nyanza banyuzwe n’umwanzuro w’Urukiko rwa Rubanda rw’Ubujurire rw’i Paris wo gufunga burundu Philippe Hategekimana uzwi nka “Biguma”, wahamijwe ibyaha byo kugira uruhare muri Jenoside yakorewe Abatutsi mu 1994.
Tariki ya 17 Ukuboza 2024, nibwo urukiko rwa Rubanda rwa Paris mu Bufaransa rwashimangiye igifungo cya burundu Hategekimana Philippe yakatiwe muri Kamena 2023, ahamijwe ibyaha bya Jenoside n’ibyibasiye inyokomuntu.
Biguma wari umujandarume i Nyanza mu gihe cya Jenoside yarakurikiranweho uruhare yagize mu bitero byagabwe ku Batutsi ku misozi ya Nyamure, Nyabubare, ISAR Songa no kuri bariyeri z’i Nyanza, ndetse n’uruhare mu rupfu rw’uwari Burugumesitiri wa Komini Ntyazo, Narcisse Nyagasaza.
Abatuye mu Karere ka Nyanza aho Biguma yakoreye ibi byaha banyuzwe n’imyanzuro y’Urukiko rwa Rubanda rw’Ubujurire rw’i Paris, nk’uko byagarutsweho n’umuyobozi w’aka Karere, Ntazinda Erasme, mu kiganiro yagiranye na RBA.
Yagize ati” Twishimiye cyane umwanzuro urukiko rwafashe, ko yahamijwe ibyaha bya Jenoside. Twishimiye ko ubutabera bwatanzwe. Abaturage b’Akarere ka Nyanza cyane cyane abarokotse Jenoside, ari abo ku Musozi wa Karama, Nyamure na Nyabubare. [Biguma] yagize uruhare rukomeye mu iyicwa ry’Abatutsi ahahoze ari Ntyazo, Nyabisindu. Twishimiye umwanzuro w’urukiko kandi ni ubutabera bukwiye.’’
Uyu muyobozi yagaragaje nta gihano cyangwa indishyi byangana ubuzima bw’abantu, ndetse agaragaza ko kuba Biguma yahamijwe icyaha agakatirwa, ari umwanya mwiza wo kuba abifuza indishyi batanga ibirego.
Biguma yageze mu Bufaransa mu 1994, yaka ibyangombwa by’ubuhunzi ahindura amazina yitwa Philippe Manier, nyuma ahabwa akazi ko gucunga umutekano kuri Kaminuza y’i Rennes, ndetse mu 2005 ahabwa ubwenegihugu bw’Ubufaransa.
Mu 2015 nibwo yatangiye gukorwaho iperereza n’Ihuriro ry’Imiryango Itegamiye kuri Leta iharanira Uburenganzira bwa Muntu, CPCR, mu 2017, Biguma yaje guhungira muri Cameroun, atabwa muri yombi mu 2018 yongera gusubizwa mu Bufaransa.
