Uruganda rwa Akagera Medecines rukora ubushakashatsi n’inkingo mu Rwanda, rwatangaje ko rwasoje icyiciro cya mbere cy’ubushakashatsi ku muti uvura igituntu uzwi nka AKG-100.
Mu itangazo bashyize hanze ku wa kabiri, tariki ya 1 Mata, Akagera Medecine yavuze ko basoje icyiciro cyo kugeragereza uyu muti uri mu bwoko bwa ‘Oxazolidinone’ busanzwe bubamo za Antibiotics.
Iri gerageza ryakorewe ku bantu mu byiciro bitandukanye birimo icya SAD, aho batanga doze nke ku muntu ikagenda yongerwa mu gihe itagaragaje ingaruka, n’icyiciro cya MAD, aho hatangwa doze zirenze imwe ku muntu zikagenda zongerwa nazo bitewe n’uko umubiri wayakiriye.
Ubushakashatsi ku muti wa AKG-100, buri gukorwa ku bantu bazima bagahabwa doze imwe, n’abarwaye igituntu bahabwa doze zirenze imwe, bikaba biri gukorerwa mu kigo cy’ubushakashatsicya cya Task, kiri Cape Town muri Afurika y’Epfo, aho biteganyijwe ko buzakorwa ku bantu barenze 100.
Umuyobozi ushinzwe ibijyanye n’Ubushakashatsi mu Akagera Medecine, Dr. Daryl Drummond yatangaje ko gusoza iki cyiciro cya mbere cy’ubushakashatsi ari intambwe ikomeye mu rugendo rwo gukora umuti wa AKG-100, uzongerwa mu yindi isanzwe ivura indwara y’igituntu.
Umuyobozi mukuru w’Akagera Medecines, Dr. Sachin Marulkar avuga ko uyu muti uzafasha mu kongerera ubushobozi iyari isanzwe binyuze mu kuyongerera imbaraga no kugabanya ubukana bw’ingaruka y’iyo miti yindi.
Umuti wa AKG-100 uzafasha mu kugabanya umubare w’abahitanwa n’indwara y’igituntu, kuko nk’uko bigaragara muri Raporo y’Umuryango w’Abibumbye wita ku Buzima, WHO, mu mwaka wa 2024, 2023 abagera kuri miliyoni 10.8 ku Isi, banduye indwara y’igituntu, muri bo abagera kuri miliyoni 1.25 yarabahitanye.
Uruganda rwa Akagera Medecines rumaze hafi imyaka ibiri rukorera mu Rwanda, aho rukora inkingo mu buryo bugezweho bwa Messenger RNA (mRNA) hifashishijwe ikoranabuhanga, kuri ubu rukaba ruri kugerageza urukingo rwa Sida, Igituntu, Covid-19 na Lassa Fever.
