Hari mu ijoro ryo ku Bunani, Mugisha Benjamin benshi bazi kw’izina rya The Ben, abamukunda kurushaho bakamwita ‘Tiger B’, yakoze igitaramo cy’amateka mu nyubako ya BK Arena, yari yuzuye ibihumbi by’abafana, n’abandi baje kumushyigikira barimo Yvan Kagame, umuhungu wa Perezida Kagame, umuhanzi Bruce Melody n’abanyamahanga nka Otile Brown n’abandi.
Ni igitaramo cyabaye tariki ya 1 Mutarama 2024, cyari kigamije kwinjiza abantu mu mwaka mushya nk’uko byumvikana mu izina ryacyo ‘The New Year Groove’ ndetse The Ben yaboneyeho kumurika album ya gatatu yari imaze imyaka ine itegerejwe yise ‘Plenty Love’.
Ku isaha ya saa moya n’igice nibwo abahanzi ba mbere bari bageze ku rubyiniro barimo Phil Emon waririmbye izirimo ‘Amasomo’, ‘Wow’, ‘Listen’ n’izindi, akurikirwa na Yampano waruririmbye bwa mbere muri BK Arena, aririmba ‘Uwo muntu’, ‘Bucura’ n’izindi.
Shami yaririmbye ‘Peace of mind’, mu gihe itsinda rya Sherrie Silver Foundation ryabyinnye ‘Fou de Toi’, ‘Komasava’ na ‘When She’s Around’, muri icyo gihe DJ Brianne niwe wavangaga imiziki, mu gihe Anitha Pendo na Lucky Nzeyimana aribo bari abashyushyarugamba.
Saa 21:30 nibwo umuhanzi The Ben yarageze ku rubyiniro yambaye imyenda y’ibara ry’umweru hose, agaragiwe n’ababyinnyi. Ubwo yaragiye kugera ku rubyiniro yakiranywe amashyi menshi n’induru, agaragarizwa n’abafana ko yishimiwe bikomeye ari nako bacanye amatoroshi ya telefone zabo.
The Ben yinjiriye mu ndirimbo igira iti ‘Iyaba mpfite amababa’, iya kabiri yaririmbye ni ‘Lose Control’ yakoranye na Meddy. Yakomeje gususurutsa ibihumbi by’abantu bari bicaye muri BK Arena mu zindi ndirimbo nka ‘True Love’ aherutse gushyira hanze igaragaramo umugore we Pamella atwite n’izindi.
The Ben ageze ku ndirimbo yahuriye n’abandi bahanzi yaririmbye ‘Nkufite ku mutima’, umuraperi Bushali amusanga ku rubyiniro barayiririmbana, yaririmbye ‘Sinarinkuzi’ na ‘Si beza’ umuhanzi akaba n’umuganga Tom Close amugeraho ku rubyiniro mu myenda y’umukara isa n’iya The Ben nawe barayiririmbana.
Ubwo yarageze ku ndirimbo ‘Inkuba’, K8 Kavuyo yamusanze ku rubyiniro barayiririmbana, ari nako bakomereza ku ndirimbo ‘Ndi Uw’i Kigali’ bahuriyemo na Meddy. Abarimo Tuff Gang bahawe umwanya wo kuririmba ndetse hatangwa umunota wo kwibuka Jay Polly na Yvan Buravan.
Umuhanzi ukomoka muri Tanzania, Otile Brown yasanze The Ben ku rubyiniro yambaye imyenda y’umutuku hose, baririmbana ‘Can’t Get Enough’, na ‘Dusuma’. Element na Kevin Kade nabo basanze Tiger B ku rubyiniro baririmba ‘Sikosa’, mu gihe Kivumbi nawe yahageze bakaririmbana ‘My Name’ baherutse gushyira hanze.
Ni igitaramo cyitabiriwe n’abarimo umuhungu wa Perezida Kagame, Yvan Kagame, Minisitiri Olivier Nduhungirehe, Minisitiri w’Urubyiruko n’Iterambere ry’Ubuhanzi, Utumatwishima Jean Nepo Abdallah, Minisitiri wa Siporo, Nelly Mukazayire n’bandi bazwi mu myidagaduro yo mu Rwanda barimo Bruce Melody, Coach Gael n’abandi.
Uyu muhanzi wagaragarijwe urukundo rudasanzwe kuri uyu mugoroba, yagize umwanya wo kuganira n’abakunzi be, abaganiriza ku buzima bwe uko yavukiye Uganda, batuye mu nzu y’icyumba na Sallon ari batandatu, yakomeje avuga ko indirimbo ‘Ndaje’ yakoranye na Zizou Alpacino, yakoze ubwo yaramaze kurokoka impanuka y’imodoka.
Uyu mugoroba wabaye muremure The Ben yaririmbye ‘Naremeye’ ayifashwa n’itorero Inyamibwa ryabyinnye Kinyarwanda. Prophet Joshua yongeye kumuhundagazaho amafaranga, The Ben avuga ko arahabwa abantu bayakeneye.
The Ben yongeye gusaba Abanyarwanda gushyigikira abahanzi babo, agira ati” Ibi bintu rero mwankoreye, n’abandi bahanzi mufite muzabibakorere.”
