Atlético Clube Do Mindelo yo muri Cape Verde, Port Autonome De Douala [PAD] yo muri Cameroun na Kenya Ports Authority yo muri Kenya, yabimburiye andi makipe kugera mu Mujyi wa Kigali aho yitabiriye Shampiyona Nyafurika yʼAmakipe yʼAbagabo muri Volleyball (CAVB Menʼs Club Championship 2026).
Amakipe 30 yo mu bihugu 17 ni yo yemerewe kwitabira iri rushanwa rihuza ay’ibigugu muri Volleyball ya Afurika.
Iri rushanwa rigiye kuba ku nshuro ya 47 rizakinirwa muri BK Arena na Petit Stade, riteganyijwe gukinwa kuva ku wa 20 Mata kugeza ku wa 3 Gicurasi 2026.
Amakipe yamaze kugera mu Mujyi wa Kigali mbere yʼandi ayobowe na Atlético Clube Do Mindelo, Port Autonome De Douala na Kenya Ports Authority, yahasesekaye kuri iki Cyumweru, tariki ya 19 Mata 2026.
Atlético Clube do Mindelo ifite ibikombe 6 bya Shampiyona ya Cape Verde birimo nʼicyo yegukanye mu 2025 nyuma yo gutsinda Voley Clube dos Espargos amaseti 3-1 mu gihe Port Autonome De Douala na yo yegukanye icyo muri Cameroun itsinze Litto Team [na yo itegerejwe i Kigali] amaseti 3-1, igitwara ku nshuro ya kabiri yikurikiranya.
Kenya Ports Authority yabaye iya kabiri muri Shampiyona ya Kenyan League mu 2024/2025, iba n’iya gatatu muri Kenya Cup 2024/25. Iyi kipe ni imwe muri eshatu zo muri Kenya zizitabira CAVB Menʼs Club Championship 2026. Andi ategerejwe ni General Service Unit na Equity Bank Volleyball Club.
Mu makipe azakina Shampiyona Nyafurika yʼAmakipe yʼAbagabo muri Volleyball, kuri ubu mu Mujyi wa Kigali hari kubarizwa arindwi. Arimo atatu yavuye hanze y’Igihugu ndetse nʼane, ya APR VC, Police VC, Kepler VC na REG VC, ahagarariye u Rwanda.
Andi makipe ategerejwe mu Rwanda kuri uyu munsi, arimo Black Rhinos yo muri Zimbabwe ihasesekara saa 19:40 ndetse na AS INJS yo muri Côte d’Ivoire biteganyijwe ko igera ku Kibuga Mpuzamahanga cy’Indege cya Kigali i Kanombe mu rukerera rwo ku wa Mbere, saa 01:05.
Ubwo iri rushanwa riheruka kuba mu 2025, ryabereye mu Mujyi wa Misurata wo muri Libya, ryegukanwa na Swehly Sports Club yo muri icyo gihugu mu gihe APR VC yo mu Rwanda yasoreje ku mwanya wa kane.
Mu 2022, Gisagara VC yakoze amateka yo kuba ikipe ya mbere yo mu Rwanda yegukanye umudali muri iri rushanwa ubwo yabaga iya gatatu itsinze Port de Douala amaseti 3-1 ubwo ryari ryabereye i Kelibia muri Tunisia.
