Umutoza w’Ikipe y’Igihugu “Amavubi”, Adel Amrouche, yashyize ahagaragara urutonde rw’abakinnyi 27 azatoranyamo abo azifashisha mu mikino ibiri yo gushaka itike y’Igikombe cy’Isi cya 2026, kizabera muri Amerika, Canada na Mexique.
Uru rutonde rwashyizwe hanze n’Ishyirahamwe ry’Umupira w’Amaguru mu Rwanda, FERWAFA, kuri uyu wa Mbere, tariki ya 25 Kanama 2025.
Ikipe y’Igihugu Amavubi izahura na Nigeria ndetse na Zimbabwe mu mikino izaba muri Nzeri 2025, mu rugendo rwo guhatanira itike y’Igikombe cy’Isi cya 2026.
Mu bakinnyi bahamagawe, hagaragayemo impinduka zitandukanye ugereranyije n’abaheruka guhamagarwa, aho bamwe batagarutse barimo Niyigena Clément, Hakim Sahabo na Samuel Gueulette.
Urutonde rwatangajwe rugaragaraho abakinnyi bakina imbere mu gihugu n’abandi basanzwe bakinira amakipe yo hanze, barimo abamenyerewe n’abandi bashya.
Mu bakinnyi bahamagawe harimo abanyezamu batatu Ntwari Fiacre usanzwe ukinira Kaizer Chiefs yo muri Afurika y’Epfo, Twizere Buhake Clément ukinira Ullensaker/Kisa yo muri Norvège na Ishimwe Pierre wa APR FC.
Abakinnyi bo hagati bahamagawe ni Bizimana Djihad (Al Ahly Tripoli), Mugisha Bonheur (Al Masry), Ngwabije Bryan Clovis (Al Ahly Tripoli), Kayibanda Claude Smith (Dieppe FC), Muhire Kevin (Jamus FC) na Mukudju Christian (Elite FC).
Abugarira ni Niyomugabo Claude (APR FC), Omborenga Fitina (APR FC), Nshimiyimana Emmanuel (Rayon Sports), Mutsinzi Ange (Zira Futbol Klubu), Nkulikiyimana Nganji (Standard de Liege), Manzi Thierry (Al Ahly Tripoli – Libya), Kavita Phanuel Mabaya (Bermingham Legion FC), Nduwayo Alexis (APR FC) na Maes Dylan Georges Francis (Union Titus Petange).
Abataha izamu ni Mugisha Gilbert (APR FC), Hamon Aly-Enzo (Angoulême CFC), Kwizera Jojéa (Rhode Island), Nshuti Innocent (Espérance Sportif de Zarzis), Biramahire Abeddy (ES Sétif ), Ishimwe Anicet (Olympique Sportif de Zarzis), Gitego Arthur (FUS Rabat), Ishimwe Djabilu (Etincelles FC ) na Niyo David (Kiyovu Sports).
Muri iyi mikino Amavubi azabanza kwakirwa n’Ikipe ya Nigeria ku wa 5 Nzeri 2025, mbere yo kwerekeza muri Zimbabwe gukina umukino wa kabiri uzaba tariki ya 10 Nzeri 2025.
Aya makipe yose ari mu Itsinda C n’u Rwanda mu majonjora y’Igikombe cy’Isi cya 2026.
Kugeza ubu nyuma y’imikino itandatu imaze gukinwa, Afurika y’Epfo ni yo ya mbere n’amanota 13 ikurikiwe n’u Rwanda n’amanota umunani runganya na Benin ya gatatu, Nigeria ni iya Kane n’amanota arindwi, Lesotho ni iya gatandatu n’amanota atandatu mu gihe Zimbabwe ari iya nyuma n’amanota ane.
