Kuri uyu wa Gatanu, tariki ya 17 Mutarama 2025, muri BK Arena hateganyijwe imikino yo guhatanira Igikombe kiruta ibindi “Super Cup Tournament 2025”, cyateguwe n’Ishyirahamwe ry’Umukino wa Basketball mu Rwanda (FERWABA), kigiye gukinwa bwa mbere.
Iri rushanwa rirakinwa mu cyiciro cy’abagabo ndetse n’icy’abagore, rihuza ikipe yegukanye igikombe cya Shampiyona n’iyegukanye Rwanda Cup.
Mu bagabo, APR BBC iracakirana na REG BBC mu gihe mu bagore REG WBBC yakira APR WBBC.
Umukino wa REG WBBC na APR WBBC uratangira saa Kumi n’Ebyiri n’Igice mu gihe uwa basaza babo ukinwa saa Mbiri n’Igice.
Iyi mikino yahawe umwihariko kuko abakunzi ba Basketball bashobora kuyikurikira imbonankubone banyuze ku ‘Irebero’.
Super Cup ni irushanwa ryatangijwe n’Inteko Rusange ya FERWABA mu 2023, akaba ari imikino ifungura Shampiyona ya Basketball, Rwanda Basketball League (RBL).
Super Cup ihuza ikipe yatwaye Igikombe cya Shampiyona n’iyatwaye Rwanda Cup.
Mu bagabo APR BBC yatwaye ibikombe byombi umwaka ushize, mu gihe REG yegukanye umwanya wa kabiri muri Rwanda Cup 2024.
Mu bagore, REG WBBC yatwaye igikombe cya Shampiyona mu gihe APR WBBC yegukanye Rwanda Cup umwaka ushize.
Ku bari hanze y’Igihugu cyangwa abatari bugere muri BK Arena, bashyiriweho uburyo bashobora gukurikirana iyi mikino yombi banyuze ku rubuga ‘Irebero’.
Kugira ngo ubashe gukurikirana iri rushanwa wishyura 2000 Frw kuri buri mukino, ku bari mu Rwanda, n’amadorali atatu (3$) ku bari hanze y’u Rwanda.
Sura urubuga www.irebero.com, wiyandikishe ukoresheje (nimero cyangwa email), uhitemo umukino wifuza gukurikira. Ushobora gukanda kuri ‘Buy Plan’, ukishyira kugira ngo uze kuryoherwa n’imikino y’ishiraniro ibanziriza Shampiyona y’u Rwanda muri Basketball.
