APR BBC yegukanye FERWABA Super Cup itsinze REG BBC amanota 73 kuri 53 mu gihe REG WBBC yatwaye iri rushanwa itsinze APR WBBC amanota 76-64.
Iyi mikino yabereye muri BK Arena ku mugoroba wo kuri uyu wa Gatanu, tariki ya 17 Mutarama 2025.
Igikombe kiruta ibindi muri Basketball y’u Rwanda “FERWABA Super Cup”, ni ku nshuro ya mbere cyakinwe. Gihuza ikipe yatwaye Igikombe cya Shampiyona n’iyegukanye Rwanda Cup.
Umukino wabanje wahuje REG WBBC na APR WBBC ndetse wari ishiraniro ku mpande zombi.
Watangiye APR WBBC iwuyoboye ariko yaje kwigaranzurwa na REG WBBC mu minota ya nyuma, iyitsinda amanota 73-53.
Benshi mu bakunzi ba Basketball bari bafite amatsiko yo kureba uko REG BBC yikiranura na APR BBC yegukanye Shampiyona y’u Rwanda na Rwanda Cup.
Iyi Kipe y’Ingabo yatangiye umukino neza ndetse amakipe yombi yagiye kuruhuka mu gice cya mbere, APR BBC ifite amanota 33 mu gihe REG BBC yari ifite 30.
Agace ka gatatu karangiye APR BBC iyoboye umukino n’amanota 53 kuri 42 ya REG BBC.
Umukino wageze mu gace ka kane, APR BBC ikomeje kuwuyobora n’amanota 53 kuri 47 ya REG BBC.
Uduce tune tugize umukino twarangiye APR BBC itsinze REG BBC amanota 73-53 yegukana FERWABA Super Cup ya mbere.
Umunya-Mali Aliou Diarra ukinira APR BBC ni we watsinze amanota menshi (19) muri uyu mukino mu gihe Thomas Cleveland Jr wa REG BBC yinjije amanota 18.
“FERWABA Super Cup” ni ryo rushanwa ryateguwe nk’iribanziriza umwaka w’imikino muri Shampiyona ya Basketball mu Rwanda, biteganyijwe ko izatangira tariki ya 24 Mutarama 2025.
