Ikipe ya APR FC yatangaje ko yamaze gusinyisha abakinnyi babiri bashya barimo Mamadou Traoré ukina mu kibuga hagati na Ernan Siluane ukina nk’urinda izamu bombi bamaze no kugera i Kigali mu Rwanda.
Kuri uyu wa Gatanu tariki 3 Nyakanga 2026 nibwo ikipe y’ingabo z’igihugu, APR FC, yatangaje ko yamaze gusinyisha aba bakinnyi babiri bashya b’abanyamahanga ndetse inongerera amasezerano Byiringiro Jean Gilbert.
Mamadou Traoré wasinyiye APR FC yari asanzwe ari kapiteni w’ikipe ya Stade Malien y’iwabo muri Mali ndetse yafashije iyi kipe kugera muri 1/4 cya CAF Champions League. Akaba azajya yambara nimero 21 mu mugongo.
Undi mukinnyi mushya wasinyiye APR FC ni Ernan Siluane ukomoka muri Mozambique ukina nk’umuzamu uzajya wambara nimero 31 mu mugongo.
Siluane w’imyaka 27 usanzwe unahamagarwa mu ikipe y’igihugu yasinyiye APR FC avuye mu ikipe ya Black Bulls FC y’iwabo muri Mozambique, akaba asanze abandi bazamu muri APR FC barimo Ishimwe Pierre ushobora kudakomezanya na yo, Hakizimana Adolphe na Ruhamyankiko Yvan.
APR FC yanatangaje ko Byiringiro Jean Gilbert ukina ku ruhande rw’iburyo yugarira nawe yamaze kongera amasezerano y’imyaka ibiri muri iyi kipe, azamugeza muri 2029.
Aba bakinnyi babiri baje biyongera ku bandi bakinnyi 4 APR FC yamaze gusinyisha barimo Ishimwe Christian ukina ku ruhande rw’ibumoso yugarira wayigarutsemo avuye muri Police FC, rutahizamu ukomoka muri Côte d’Ivoire Amani Kouadiokan Michel Breygeneve wavuye muri AFAD Djékanou, Rubuguza Jean Pierre ukina mu kibuga hagati wavuye muri Gicumbi FC na rutahizamu Uwiyaremye Fidali wavuye muri Kiyovu Sports.
Kugeza ubu ni abakinnyi bane gusa ikipe ya APR FC yamaze kwemeza ko yatandukanye nabo barangajwe imbere n’uwari kapiteni wayo Niyomugabo Claude ndetse n’abanyamahanga batatu aribo Aliou Souané, Mamadou Sy na Mahamadou Lamine Bah ari nabo bayisohotsemo ku ikubitiro.
Mu bandi bakinnyi bivugwa ko batazakomezanya n’iyi kipe barimo umuzamu Ishimwe Pierre, myugariro Niyigena Clement wabonye indi kipe, Mugisha Gilbert, Ruboneka Jean Bosco, na Niyibizi Ramadhan.
Nyuma yo gutwara Shampiyona y’u Rwanda mu makipe yo mu Rwanda, BK Pro League National Championship, n’igikombe cy’amahoro, ubu APR FC ihanze amaso igikombe cya CECAFA Kagame Cup 2026 kizabera mu Rwanda kuva tariki 24 Nyakanga kugeza tariki 8 Kanama 2026.
