Nyuma y’ikirego cy’ikipe ya Gorilla FC, Ikipe ya APR FC yatewe mpaga y’ibitego bitatu ku mukino yakinnye na Gorilla FC igakinisha abakinnyi barindwi b’abanyamahanga. Ibi byatumye Gorilla ihabwa amanota atatu, n’igiteranyo cy’ibitego bitatu.
Nyuma y’umukino w’umunsi wa munani, ikipe ya Gorilla FC yanganyijemo na APRC kuri Kigali Pele Stadium, ikipe ya Gorilla FC yatanze ikirego muri FERWAFA cyo kuba iyi kipe ya APR FC yaratangiranye mu kibuga abakinnyi 7, ibintu binyuranyije n’amabwiriza y’irushanwa.
Amabwiriza yihariye agenga Rwanda Premier League 2024/2025 mu ibaruwa yo ku wa 01/09/2024 yoherejwe amakipe yose y’ikiciro cya mbere, yamenyeshejwe ko yemerewe gushyira ku rupapuro rw’umukino (feuille de match) abakinnyi b’abanyamahanga batarenze 10 no gukinisha abakinnyi b’abanyamahanga batarenze 6 mu kibuga.
Komisiyo imaze gusuzuma raporo y’abayobozi b’umukino wavuzwe haruguru yasanze APR FC yarakoze ikosa ryo gukinisha umubare w’abakinnyi b’abanyamahanga barenze umubare wagenwe, iyihanisha mpanga y’ibitego bitatu.
Itangazo rigira riti “Komisiyo ishingiye ku ngingo ya 37 n’iya 40 y’amategeko agenga amarushanwa ya FERWAFA yemeje ko
APR FC itewe mpaga y’ibitego 3 naho Gorilla FC ikaba ibonye amanota 3 n’igiteranyo cy’ibitego 3 kuri uwo mukino. APR FC kandi ihanishijwe kwishyura amande y’ibihumbi ijana y’amafaranga y’u Rwanda (100,000 Frw)”
Nyuma yo guterwa mpaga, APR FC isigaranye amanota 4, ikaba ihise ijya mu mwanya wa 15 imbere ya Kiyovu Sports ya nyuma.
