Umukinnyi w’umuhanga muri sinema nyarwanda, Bahavu Jannet agiye gushyira hanze igice cya kabiri cya filime “Bad Choice” izaba ivuga ku buzima bwo mu ngo. Ikaba izagaragaramo ibyamamare nka Mukasekuru Fabiola wamenyekanye cyane muri filime ‘Amarira y’u rukundo’.
Mukasekuru Fabiola yongeye kugaruka muri sinema nyuma y’igihe kinini atagaragara, ndetse kuri ubu akaba azagaragara muri filime ‘Bad Choice 2’ ya Bahavu Jannet izamurikwa tariki ya 27 Nzeri 2024, muri Canal Olympia.
Umugabo wa Bahavu, Ndayirukiye Fleury uri mu batunganyije amashusho y’iyi filime yambwiye Inyarwanda ko bahisemo kwifashisha Fabiola kuko ari mu bakunzwe cyane muri sinema mu myaka yashize, ndetse ubuhanga bwe mu gukina bukaba budashidikanywaho.
Ati “ Fabiola ni umukinnyi mwiza kandi ufite impano uzi gukina. Kandi ni umuntu wakunzwe kuva cyera, yakoze filime yakunzwe nka ‘Amarira y’urukundo’ n’izindi zitandukanye.
Rero, twamwifashijemo, tumuzanamo kugira ngo twongere imbaraga muri filime. Ikindi hari abantu benshi bamukunze, twamuzanyemo kugira ngo abantu bongere bamubone.”
Iyi filime kandi izagaragaramo abakinnyi bazwi muri sinema nyarwanda barimo Mama Zuru, Kankwanzi, Nkaka, Nick wamamaye muri City Maid, ndetse n’abandi bakinnyi bashya barimo abanyeshuri Bahavu aherutse kwinjiza muri sinema nyuma yo gusoza amahugurwa mu bijyanye no gukina filime.
Bahavu yasobanuye ko iyi filime izaba ivuga kuri byinshi mu bigaragara mu ngo abantu bamwe batamenya, ati “ Urugo rubi rumenywa n’ururimo naho abari hanze yarwo iyobabonye haritafari rigeretse kurindi, bumva ukwiye no kuhapfira ngo udaseba cyangwa se ngubure ubutunzi bati gumaho wubake, niko zubukwa.
Tekereza, wongere utekereze mbere yo guhitamo uwo muzubakana urugo, kuko niho uzaba utangiriye kubaho icyiciro cyawe cyose usigaje kubaho muri ubu bu buzima.”
