Perezida Kagame yagaye urubyiruko rwiyambika ubusa, agaragaza ko ikibazo gikomeye bafite ari uko usanga nta n’ubumenyi bafite ndetse bidakwiye ko bihabwa intebe mu Muryango Nyarwanda.
Ni ingingo yagarutseho mu masengesho yo gushimira no gusabira igihugu, yabaye kuri iki Cyumweru, agaruka ku myitwarire mibi ikunze kugaragara mu rubyiruko, ndetse igira ingaruka ku gihugu.
Umukuru w’Igihugu yakomoje ku kibazo cy’urubyiruko rwambara ubusa, ndetse abwira abayobozi ko bagomba kubikurikirana kuko bigira uruhare mu gusenya igihugu.
Ati “Uwambara ubusa ararata iki abandi badafite, twese tudafite? Nta dini ribaho ryo kwambara ubusa, nta muryango ubaho wo kwambara ubusa, ariko burya kwambara ubusa ntabwo ari bwa busa, burya bambaye ubusa no mu mutwe.”
Umukuru w’Igihugu yabigarutseho mu gihe muri iyi minsi hakomeje gucaracara amashusho n’amafoto y’abana b’abakobwa ndetse n’ibyamamare bambaye ubusa, abandi bari mu bikorwa by’ishimishamubiri bisa n’ubusambanyi.
Amashusho yakwirakwijwe cyane arimo avugwa ko ari aya Kwizera Emelyne wagaragaye yambaye ubusa ari kumwe n’abandi bakobwa.
Kwizera Emelyne yamamaye cyane ubwo yagaragaraga mu mashusho afashwe n’umuhanzi The Ben mu mayunguyungu, ari kumukurura akenda yari yambaye mu nda kazwi nk’ishanga. Aya mashusho yafatiwe i Musanze mu gitaramo uyu muhanzi yahakoreye tariki 17 Kanama 2024.
Muri iyi minsi, uyu mukobwa yongeye kurikoroza ku mbuga nkoranyambaga ndetse amashusho arimo ari gukwirakwizwa na benshi agaragaramo yambaye ubusa.
Mu mashusho menshi ahari hari n’ayo uwo bivugwa ko ari Kwizera Emelyne agaragara ari kwikinisha akoresheje icupa rijyamo kimwe mu binyobwa byengerwa mu Rwanda.
Andi mashusho yasakajwe ni ay’umukinnyi wa APR BBC, Adonis Filer, uri mu rukundo na Kathia Kamali, watamajwe n’abakobwa bavuga ko yaryamanye na benshi mu nzu ye.
Perezida Kagame yabwiye abayobozi bateraniye muri aya masengesho ko badakwiye kwemerera Umuryango Nyarwanda ko ubaho mu buryo butagendeye ku ndangagaciro ziboneye.
Ati “Uko twicaye hano nk’abayobozi inshingano tuzaba twuzuza ni izihe, ni izambika ubusa, Abanyarwanda uko abana tubarera, ari abana ari abakuru ni uko turerwa? Nuko turera?”
Yakomoje ku rubyiruko rwishora mu biyobyabwenge agaragaza ko ari byo ntandaro zo gusenyuka kw’ingo no gutandukana kw’abashakanye, yongera kubaza abayobozi uruhare rwabo mu kurwanya iyi myitwarire ikunze kugaragara mu rubyiruko.
Perezida Kagame yibukije imiryango ko igomba kurera no kuganiriza abayigize kuko bifasha mu kubaka igihugu.
