Ishyirahamwe ry’Umupira w’Amaguru muri Afurika (CAF) ryemeje ko u Rwanda ruzitabira irushanwa ry’Igikombe cya Afurika cy’abakina imbere mu bihugu byabo, CHAN 2024.
Ku wa gatandatu, tariki ya 28 Ukuboza nibwo Amavubi yakinnye n’ikipe y’Igihugu ya Sudani Y’Epfo iyitsinda ibitego 2-1, ayisezerera mu mikino y’amajonjora yo gushaka itike ya CHAN 2024.
Nyuma yuko Sudani y’Epfo isezerewe u Rwanda rwari rutegereje umwanzuro wa CAF wo kumenya niba rurakomeza muri CHAN nk’imwe mu makipe abiri asimbura Libya na Tunisia zikuye mu irushanwa.
Kuri iki cyumweru CAF yatangaje amakipe 10 amaze kwemezwa ko azitabira CHAN 2024, arimo n’u Rwanda, ikazaba guhera tariki ya 1-28 Gashyantare 2025.
Andi makipe ni Angola, Burkina Faso, Centrafrique, Guinea, Niger, Nigeria, Sénégal, Sudan na Zambia y’iyongeraho Maroc itaranyuze mu irushanwa na Kenya, Tanzania na Uganda bizakira iri rushanwa.
Kuri iki cyumweru hari hateganyijwe indi mikino itanu nayo iri butange andi makipe yo kujya muri CHAN, ariyo uri buhuze Madagascar na Eswatini, Congo na Guinée équatoriale, Mali na Mauritania, RDC na Chad na Uganda iri bukine n’u Burundi.
