Ishyirahamwe ry’Umupira w’Amaguru mu Rwanda, FERWAFA, ryamuritse ikirango (Logo) cya Shampiyona y’icyiciro cya mbere mu bagore yitwa Rwanda Women Super League (RWSL).
Ni igikorwa cyabaye kuri uyu wa Gatanu, tariki ya 9 Mutarama, mu kiganiro FERWAFA yagiranye n’itangazamu cyinjira mu mwaka wa 2026.
Iki kiganiro kandi cyari kiyobowe n’umuyobozi wa FERWAFA, Shema Fabrice, kiragaruka ku mitegurire y’igikombe kiruta ibindi cya Super Cup ndetse n’izindi gahunda ziri imbere muri ruhago.
FERWAFA yaboneyeho no kumurika ikirango kizajya gikoreshwa muri Shampiyona y’umupira w’amaguru w’abagore, Rwanda Women Super League.
Umuyobozi wa FERWAFA, Shema yavuze ko abagore bari bamaze igihe bakina, ariko nta zina amarushanwa yabo afite.
Ati” Uyu munsi kugirango tugire izina no kugirango umupira w’amaguro ugume utera imbere buri cyiciro twagishakiye izina ridasanzwe, tuyiha ikirango cyayo, no kugirango amakipe yumwe akina Shampiyona ikomeye.”
Yavuze ko iyi Shampiyona izakinwa n’amakipe 12, ubundi hazajye hahembwa amakipe atandatu ya mbere yitwaye neza.
Ni mu gihe mu mikino izajya ikinwa mu Cyumweru, ibiri muri yo izajya inyuzwa mu buryo bw’amashusho kuri FERWAFA+, mu gihe hagitegerejwe uko byanozwa kugirango imikino yose yerekanwe.
Shema yakomeje avuga ko bafite gahunda yo guteza imbere umupira w’amaguru bahereye ku bakiri bato guhera ku myaka 17, kugirango abana b’abakobwa babe bagera muri Shampiyona mpuzamahanga.
Komiseri ushinzwe iterambere ry’umupira w’abagore muri FERWAFA, Nitika Gicanda, yavuze ko mu kirango bashyizemo ibara rya ‘Orange’ rya FIFA n’ibara ry’Ubururu rikoreshwa n’Umuryango Mpuzamahanga mu kwamagana ivangura rishingiye ku gitsina.
Yakomeje avuga ko bari gushaka abaterankunga ku buryo mu mwaka utaha izarushaho gutera imbere.
Iki kiganiro kibaye mu gihe ku munsi w’ejo ku wa Gatandatu, tariki ya 10 Mutarama, hateganyijwe imikino ya isoza Igikombe cya Super Cup, aho ikipe y’abagore ya Rayon Sport izahura na Indahangarwa ku isaha ya 15:00, naho ikipe y’abagabo ya Rayon Sports igahura na APR FC ku isaha ya 18:30.
