Umunyamabanga Mukuru wa FPR Inkotanyi, Wellars Gasamagera, yagiranye ibiganiro n’Umuyobozi Nshingwabikorwa w’Ishyaka riri ku Butegetsi muri Singapore, PAP (People’s Action Party), Alex Yam.
Ibi biganiro byabaye kuri uyu wa Gatanu, tariki ya 10 Mutarama 2025, byakozwe hifashishijwe ikoranabuhanga aho byibanze ku gushyiraho umubano hagati y’impande zombi hagamijwe gushimangira usanzweho hagati y’u Rwanda na Singapore.
Singapore n’igihugu u Rwanda rufatiraho urugero, kuko ni kimwe mu bihugu byo ku Isi byateye imbere mu buryo bwihuse ndetse gifite ubukungu buri ku rwego rwo hejuru.
Ibihugu byombi kandi bifitanye imikoranire ifitiye abaturage babyo akamaro kuko byashyize umukono ku masezerano akuraho viza ku baturage babyo.
U Rwanda rusanzwe rufitanye umubano na Singapore watangiye mu 2005, ushingiye ku bikorwa by’ubucuruzi, ikoranabuhanga, guteza imbere imibereho myiza y’abaturage no kwimakaza iterambere ry’ubukungu.
U Rwanda kandi rusanzwe rufitanye amasezerano na Singapore azamara imyaka itanu, mu bijyanye n’ikoranabuhanga ry’ubwenge buhangano (AI) mu kwimakaza umutekano wo kuri internet.
