Ikipe y’Igihugu y’u Rwanda ya Handball y’Abagabo yatangiye neza imikino y’Igikombe cya Afurika cya Handball 2026 (CAN Handball), itsinda Zambia ibitego 30-19, mu mukino wayo wa mbere w’iri rushanwa.
Iri rushanwa ririmo kubera mu Rwanda, guhera ku wa Gatatu tariki ya 21-31 Mutarama 2026. Imikino iri kubera mu nyubako ya BK Arena na Petit Stade.
Iri rushanwa riri kuba ku nshuro ya 27, ryitabiriwe n’amakipe 16 yo ku Mugabane wa Afurika, agabanyije mu matsinda ane agiye agizwe n’amakipe ane.
Itsinda A, ari naryo u Rwanda rurimo ruhuriyemo na Algeria, Nigeria na Zambia. Itsinda B rigizwe na Misiri, Angola, Gabon na Uganda. Itsinda C ririmo Tunisia, Guinea, Cameroon na Kenya, mu gihe itsinda D rigizwe na Cape Verde, Maroc, Congo na Benin.
Ku munsi wa mbere w’iri rushanwa, amakipe umunani yakinnye imikino yayo ya mbere.
Angola yatsinze Uganda ibitego 37-21, Guinea itsinda Kenya ibitego 36-27, Nigeria itsinda Algeria ibitego 25-23, mu gihe Misiri ari nayo yegukanye ibitse Igikombe yatsinze Gabon ibitego 36-25.
Mu yindi mikino yabaye uyu munsi, Tunisia yatsinze Cameroon ibitego 41-22, Maroc itsinda Benin ibitego 52-28, naho Cape Verde itsinda Congo ibitego 34-28.
Umukino usoza imikino y’umunsi wa mbere wahuje u Rwanda na Zambia, warangiye u Rwanda rwegukanye intsinzi y’ibitego 30-19.
Uyu mukino wabanjirijwe n’ibikorwa byo gufungura ku mugaragaro iri rushanwa ku nshuro ya mbere ribereye mu Rwanda, birimo kumurika imbyino n’umuco w’ibihugu bitandukanye byitabiriye Igikombe cya Afurika cya Handball cya 2026.
Imikino y’Igikombe cya Afurika cya Handball izakomeza ku munsi wayo wa Kabiri,uzakinwa ejo ku wa Kane, tariki ya 22 Mutarama 2026, aho hateganyijwe imikino umunani, ubwo ni ukuvuga ko amakipe yose azakina.
