Ikigo cy’Igihugu cy’Ibarurishamibare, NISR, cyatangaje ko mu mujyi no mu cyaro , mu kwezi kwa Nzeri 2025, ibiciro mu Rwanda byiyongereyeho 6,2% ugereranyije na Nzeri 2024.
Mu kwezi kwa Kanama 2025 ibiciro byari byiyongereyeho 6,4%.
NISR ivuga ko bimwe mu byatumye ibiciro byiyongera mu kwezi kwa Nzeri 2025 ari ibiciro by’ibiribwa n’ibinyobwa bidasembuye byiyongereyeho 4%, ibiciro by’ibinyobwa bisembuye n’itabi byiyongereyeho 12,3%, ibiciro by’ibijyanye n’ubuvuzi byiyongereyeho 62,5%, ibiciro by’ibijyanye n’ubwikorezi byiyongereyeho 6,8% n’ibiciro by’amafunguro n’icumbi byiyongereyeho 17,1% .
NISR ivuga ko ugereranyije Nzeri 2025 na Kanama 2025, ibiciro byo mu mujyi no mu cyaro byiyongereyeho 1,3%. Iri zamuka ryatewe ahanini n’ibiciro by’ibiribwa n’ibinyobwa bidasembuye byiyongereyeho 1,6%.
Mu Mujyi byariyongereye
Iki kigo gikomeza kivuga ibiciro ku masoko mu mijyi muri Nzeri byiyongereyeho 7,3% ugereranyije na Nzeri 2024. Ni mu gihe muri Kanama 2025 byari byiyongereyeho 7,1%.
Ikigo cy’Igihugu cy’Ibarurishamibare, NISR, kivuga ko mu kwezi kwa Nzeri 2025, ibiciro byiyongereye mu mijyi bitewe ahanini n’ibiciro by’ibiribwa n’ibinyobwa bidasembuye byiyongereyeho 4,2%, ibiciro by’ibinyobwa bisembuye n’itabi byiyongereyeho 15%, ibiciro by’amazu, amazi, amashanyarazi, gazi n’ibindi bicanwa byiyongereyeho 4,1%, ibiciro by’ibijyanye n’ubuvuzi byiyongereyeho 71,1%, ibiciro by’ibijyanye n’ubwikorezi byiyongereyeho 8,6% n’ibiciro by’amafunguro n’icumbi byiyongereyeho 17,7%.
Ugereranyije Nzeri 2025 na Nzeri 2024, ibiciro by’ibintu bitarimo ibiribwa n’ibikomoka ku ngufu byiyongereyeho 8,9%.
Ugereranyije Nzeri 2025 na Kanama 2025, mu mujyi ibiciro byiyongereyeho 1,4%.
Iri zamuka ryatewe ahanini n’ibiciro by’ibiribwa n’ibinyobwa bidasembuye byiyongereyeho 1,3%, ibiciro by’amazu, amazi, amashanyarazi, gazi n’ibindi bicanwa byiyongereyeho 1,9% n’ibiciro by’uburezi byiyongereyeho 11,5% .
Ibiciro mu cyaro naho byariyongereye
NISR ivuga ko mu kwezi kwa Nzeri 2025, ibiciro mu byaro byiyongereyeho 5,5% ugereranyije na Nzeri 2024.
Ni mu gihe ibiciro mu kwezi kwa Kanama 2025 byari byiyongereyeho 5,9%.
Bimwe mu byatumye ibiciro byiyongera mu kwezi kwa Nzeri 2025 ni ibiciro by’ibiribwa n’ibinyobwa bidasembuye byiyongereyeho 3,9%, ibiciro by’ibinyobwa bisembuye n’itabi byiyongereyeho 11%, ibiciro by’ibijyanye n’ubuvuzi byiyongereyeho 54,8% n’ibiciro by’amafunguro n’icumbi byiyongereyeho 16,3%.
Ugereranyije Nzeri 2025 na Kanama 2025,mu cyaro ibiciro byiyongereyeho 1,2%.
Iri zamuka ryatewe ahanini n’ibiciro by’ibiribwa n’ibinyobwa bidasembuye byiyongereyeho 1,7%.
