Inama yagombaga guhuza Perezida w’Igihugu cy’u Rwanda, Repubulika Iharanira Demokarasi ya Congo na Angola, byasubitswe biturutse ku kuba RDC yanze kugirana ibiganiro bitaziguye na M23, bigamije gushaka ibisubizo by’umutekano muke uri mu burasirazuba bwa RDC.
Ni mu itangazo ryashyizwe hanze na Minisiteri y’Ububanyi n’Amahanga n’Ubutwererane, rivuga ko ibiganiro byari biteganyijwe kuri iki cyumweru, tariki ya 15 Ukuboza 2024, byari guhuza abakuru b’ibihugu bitatu, i Luanda, byasubitswe.
Umunsi wabanjirije nyirizina, ku wa gatandatu tariki ya 14 Ukuboza, i Luanda hari hateraniye inama y’Abaminisiti ku mpande zombi, ariko haza kubamo kutumvikana binyuze mu kuba RDC yarahakanye ibyo kugirana ibiganiro n’umutwe wa M23, kandi hari amakuru y’uko ku wa 30 Ugushyingo 2024, Angola yari yemeje ko RDC yemeye ibiganiro na M23.
Nyuma y’uko Angola y’umuhuza muri ibi biganiro atangaje ko byasubitswe, Felix Tshisekedi wari wamaze kugera i Luanda yahise agirana ibiganiro by’ihariye na Perezida João Lourenço wa Angola, na Perezida Uhuru Kenyatta, ufite mu nshingano gahunda yo guhuza Congo n’imitwe iyirwanya binyuze mu biganiro.
