Imiryango IBUKA, AERG na GAERG-Aheza yihurije hamwe ikomeza kwitwa IBUKA mu rwego rwo gushyira hamwe no kongera imbaraga mu mikorere y’Imiryango iharanira inyungu z’Abarokotse Jenoside yakorewe Abatutsi.
Ni itangazo uyu muryango washyize hanze, kuri iki cyumweru, tariki ya 8 Ukuboza 2024, isobanura ko ari icyemezo cyafashwe nyuma y’ibiganiro byari bimaze igihe bibyigaho.
Umuryango wa IBUKA washinzwe mu rwego rwo guhangana no gukemura ibibazo bituruka ku ngaruka za Jenoside yakorewe Abatutsi mu 1994, byaba ibiri mu gihugu imbere no mu mahanga.
Uyu muryango ufatanya n’Abanyarwanda mu guharanira ko amateka ya Jenoside yakorewe Abatutsi mu 1994 atazibagirana, ndetse no guhangana n’abahakana n’abayipfobya. Ndetse uvuga ko uzakomeza gukorana n’u Rwanda muri gahunda nziza y’Ubumwe n’Ubudaheranwa.
Nyuma y’uko iyi miryango itatu yihurije hamwe ikaguma kwitwa IBUKA, inteko rusanjye yashyizeho abayobozi, aho Perezida wa IBUKA yagizwe Dr Philibert Gakwenzire, Visi Perezida wa mbere aba Christine Muhongayire, Visi Perezida wa kabiri aba Blaise Ndizihiwe naho Umunyamabanga Mukuru aba Louis de Montfort Mujyambere.
Ku mwanya wa Komiseri ushinzwe Urubyiruko, Uburezi n’Umuco hashyizweho Aline Mpinganzima, mu gihe Komiseri ushinzwe Kwibuka, Ubudaheranwa, Ubutabera no Kubaka Amahoro arambye ari Me
Janvier Bayingana.
Komiseri ushinzwe Ubuzima, Imibereho myiza no Kwimakaza Uburinganire ni Monique
Gahongayire naho Komiseri ushinzwe Ubushakashatsi, Iterambere, Kubaka Ubushobozi n’Ishoramari ni Evode Ndatsikira.
