Umuryango Unity Club Intwararumuri kubufatanye na Minisiteri y’Ubumwe bw’ Abanyarwanda n’Inshingano Mboneragihugu (MINUBUMWE), bagiye gukora Ihuriro ngarukamwaka rya 17.
Biteganyijwe ko rizaba tariki ya 16 Ugushyingo 2024, rikaba rifite insanganyamatsiko igira iti “Ndi Umunyarwanda Igitekerezo ngenga cy’Ukubaho kwacu”.
Ni ihuriro rizibanda ku ntego rusange yo gukomeza kwimakaza umuco w’ibiganiro byubaka, kandi bishimangira Indangagaciro na Kirazira z’Umuco Nyarwanda.
Rizaba ari umwanya ku bayobozi wo gukora ubusesenguzi bugamije kwihutisha no kunoza ibyo bakora, byitsa kuri gahunda y’iterambere ya Guverinoma y’u Rwanda y’imyaka itanu (NST2).
Iki gikorwa kizabanzirizwa n’Inteko Rusange y’Abanyamuryango ba Unity Club, aho bazaganira ku buzima bw’umuryango, hakanakirwa abanyamuryango bashya 19 binjiye muri Unity Club muri uyu mwaka.
Hateganyijwe kandi Ihuriro ryaguye rizahuza aba banyamuryango n’abandi batumirwa, barimo abayobozi mu nzego nkuru z’ubuyobozi bw’Igihugu, Abayobozi b’Uturere, Sosiyete civile, Abikorera n’Abahagaririye amadini n’urubyiruko.
Ihuriro ngarukamwaka rya 17 rizasozwa hamurikwa imyanzuro ngiro yavuyemo, ndetse hatangwa ishimwe (Unity Award 2024), ku Barinzi b’Igihango ku rwego w’Igihugu.
Umuryango Unit Club uyobowe na Madamu Jeannette Kagame, washinzwe muri Gashyantare 1996, ufite intego yo “Kwimakaza umuco w’ubumwe n’amahoro, byo nkingi ziterambere rirambye”.
Kugeza ubu uyu muryango ufite abanyamuryango 332, ukaba ugamije gutanga umusanzu mu kubaka ubumwe bw’Abanyarwanda, ndetse ugizwe n’abayobozi bari muri Guverinoma n’abayihozemo ndetse n’abo bashakanye.
