Abamotari batwara moto z’Amashanyarazi mu mujyi wa Kigali bishimira ko zihendutse kandi zitangiza ibidukikije, ariko basobanura ko hari ibigikeneye kunozwa birimo kongera amagaraje n’abakanishi bazo.
Muri Mutarama 2025, Leta y’u Rwanda izahagarika kwandika moto nshya zitwara abagenzi zikoresha ibikomoka kuri peterelo, hakazajya handikwa izikoresha amashanyarazi hagamijwe kwimakaza ubwikorezi bunoze, kandi butagira uruhare mu kohereza imyuka yangiza ikirere n’ibidukikije.
Umu motari ukorera mu mujyi wa Kigali, wabanje gutwaraho moto ya lisansi akimukira kuri moto y’amashanyarazi yasobanuye ko bateri itanzwe ku giciro kimwe na lisansi, yungura kurusha lisansi.
Ati” Bateri imwe niba igura 2000 no kujya kuri sitasiyo ugafata lisansi ya 2000, bateri yungura kurusha lisansi kuko lisansi yashiramo mbere ya bateri.”
Undi mu motari avuga iyo bari mu mujyi wa Kigali batagorwa no kubona bateri z’umuriro, kuko sitasiyo zizitanga zimaze kugera hirya no hino mu mujyi.
Yongeyeho ko mbere yo kwakira moto y’amashanyarazi umumotari yandikwa muri sisitemu bahuriyemo itanga ubutumwa burebana na moto z’amashanyarazi.
Ati” Mbere y’uko ujya gufata moto y’amashanyarazi, bagushyira muri sisitemu, ku buryo niyo bafunga sitasiyo ahantu runaka, bahita baguha ubutumwa, y’uko ahantu aha naha bahashyize sitasiyo nshyashya wajya gufatiraho bateri. Hari na nimero baba baraguhaye wahamagara ugize ikibazo.”
Abakoresha izi moto bavuga ko ingorane bagihura nazo ari uburyo bwo kuzikoresha mu gihe zahuye n’ikibazo kubera ko ibikoresho nsimbura byazo bigihenze, amagaraje n’abakanishi byose bikiri bike.
Ati” Ibikoresho nsimbura byazo birahenze ugereranyije na moto za moteri. Amagaraje yazo nayo ni makeya ntago wakoresha ahabonetse hose, ikindi kandi abakanishi ba sosiyeti izitanga nibo bazi kuzikora, ntago abakanishi bose bazi kuzikora.
Aba bamotari bavuga ko hakirimo izindi mbogamizi nko guhabwa bateri ituzuye kandi bishyuye ayuzuye, kubura ibikoresho bimwe bituma bamara igihe baparitse, kuba badashobora gutwara ibinyabiziga byabo mu ntara kuko hataragezwa sitasiyo zazo n’ibindi.
Minisiteri y’ibikorwaremezo yatangaje iyi gahunda itazagira ingaruka kuri moto zisanzwe zaranditswe kuko zizakomeza gukora nk’ibisanzwe, ariko zikorerwa isuzuma harebwa niba zujuje ibisabwa bituma zitangiza ikirere.
Muri 2021 nibwo u Rwanda ku bufatanye n’Ishami ry’Umuryango w’Abibumbye rishinzwe Iterambere (UNDP), batangiye umushinga wo gusimbuza ibinyabiziga bya moto bikoresha lisansi, ibikoresha amashanyarazi hagamijwe kubungabunga ibidukikije.
Muri icyo ghe moto zirenga 100.000 zari zanditswe mu gihugu hose, zirimo 46.000 zitwara abantu mu buryo bwa rusanjye, muri zo 26.000 zikorera mu mujyi wa Kigali
https://www.flickr.com/photos/201489957@N06/albums/72177720321904466/
Photos: Fils Pictures
