Umuyobozi w’Urwego rw’Igihugu rw’Imiyoborere (RGB), Dr. Doris Uwicyeza Picard yagejeje ku Nteko Ishinga Amategeko imitwe yombi, raporo y’ibikorwa by’umwaka wa 2023/2024 na gahunda y’ibikorwa by’umwaka wa 2024/2025.
Iyi raporo yagaragajwe kuri uyu wa kabiri tariki ya 29 Ukwakira 2024, igaragaza ko mu miryango 116 itari iya Leta ishingiye ku myemerere yasabye ubuzima gatozi 19 ariyo yabwemerewe, indi 97 itari yujuje ibisabwa.
Hakozwe igenzurwa ku miryango ishingiye ku myemerere 20 rijyanye n’imiyoborere n’iyubahirizwa ry’amategeko basanga biri ku gipimo cya 74,2%, mu gihe icungamutungo ry’abakozi riri kuri 55,7%.
Iri genzurwa rijyanye n’imiyoborere n’iyubahirizwa ry’amategeko ryakozwe ku miryango itari iya Leta rigaragaza ko biri ku gipimo cya 47, kikaba ari igipimo kiri hasi.
Imiryango itari iya Leta yasabye ibyangombwa by’iyandikwa ry’agateganyo yari 247 hemererwa 109, mu gihe 226 yasabye ubuzima gatozi 105 basanze itujuje ibisabwa.
Imiryango mvamahanga itari iya Leta yasabye icyangombwa cy’iyandikwa yari 25, iyabihawe ni 21, mu gihe 128 yasabye kongererwa igihe cyo gukora 115 yaremerewe, indi 13 basanga itujuje ibisabwa.
Raporo igaragaza ko imiryango mvamahanga itari iya Leta yakoze ibikorwa mu nzego zitandukanye bifite agaciro ka miliyoni zisaga 268$.
Ubugenzuzi bwakozwe ku nsengero n’imisigiti bwasize 9880 zifunzwe, ariko 44 zarafunguwe zimaze kuzuza ibisabwa, ahantu 110 hasengerwaga hatari mu rusengero naho hahise hafungwa, indi miryango n’amadini igera kuri 47 yamburwa uburenganzira bwo gukorera mu Rwanda.
Muri iyi raporo igaragaza ko umutekano uza ku mwanya wa mbere mu byishimirwa n’abaturage ku kigero cya 91,3%, mu gihe serivise z’ubuhinzi arizo zishimirwa ku kigero cyo hasi cya 61,5%.
