Umugaba w’Ingabo wungirije ushinzwe Ibikorwa n’Igenamigambi mu bw’Ubutumwa bw’Amahoro bw’Umuryango w’Abibumbye muri Sudani y’Epfo (UNMISS) akaba n’Intumwa y’u Rwanda muri Sudani y’Epfo, Brig Gen Kanobayire Louis, yasuye ingabo z’u Rwanda (Rwanda RWANBATT3) ziri i Juba muri icyo gihugu.
Mu birindiro biherereye i Durupi mu nkengero z’Umurwa Mukuru Juba, Brig Gen Kanobayire yari agiye gusezera kuri iryo tsinda ririmo gusoza ubutumwa.
Yakiriwe n’Umuyobozi wa RWANBATT3 Col. Leodomir Uwizeyimana, amugezeho amakuru arambuye y’ibikorwa by’iyo batayo y’Ingabo z’u Rwanda mu bice ishinzwe gucungira umutekano.
Ayo makuru yari akubiyemo imiterere y’umutekano n’ibindi bikorwa bakomeje gushyira mu bikorwa, birimo n’ibihundura imibereho y’abaturage ba Sudani y’Epfo.
Brig. Gen. Kanobayire yashimye byimazeyo umurimo w’indashyikirwa wakozwe na RWANBATT3 muri Sudani y’Epfo.
By’umwihariko yashimye ikinyabupfura cyaranze abasirikare boherejwe muri ubwo butumwa, indangagaciro yo kwiyemeza gusohoza ubutumwa, n’uruhare bagize mu kuzamura ibendera ry’u Rwanda binyuze mu kwimakaza ubunyamwuga n’ubwitange budatezuka.
Nanone kandi yagarutse ku myitwarire myiza iyo batayo yagaragaje mu gucungira umutekano inkambi ya gatatu y’abaturage bakuwe mu byabo n’umutekano muke, akaba ari intambwe ihebuje ikomeje gushimwa n’Igihugu ndetse n’amahanga muri rusange.
Yaboneyeho gushishikariza abagize batayo ya RWANBATT3 gukomeza kurangwa n’ikinyabupfura, ubunyamwuga no guhora biteguye gutumwa kandi bikajyana no gusohoza ubwo butumwa kinyamwuga.
