RSSB yatangaje ko guhera muri Mutarama 2025, umusanzu w’ubwizigame w’izabukuru (Pension), uzazamurwa ukagera kuri 12% ukuwe kuri 6% waruriho kuva 1962. Ibi bisobanurwa nk’uburyo bwo kuzamura amafaranga abajya mu zabukuru bahabwaga, akazajya abafasha mu kwiteza imbere, dore ko n’ibiciro kw’isoko bizamuka umunsi kuwundi.
Ku mugoroba wo ku wa mbere, tariki ya 2 Ukuboza 2024, RSSB yagiranye ikiganiro n’itangazamakuru, batanga umucyo kuri iyi gahunda, aho basobanuye ko izagira ingaruka ku bukungu bwaba ubw’umukozi, umukoresha, n’uhabwa pansiyo.
Ushobora kwibaza uti byubatse bite! Ubusanzwe umusanzu w’ubwiteganyirize waruri kuri 6% aho umukozi yatangaga 3%, umukoresha we akamutangira andi 3%. Guhera muri Mutarama umusanzu w’ubwiteganyirize uzikuba kabiri, bituma umukozi azajya atanga 6%, umukoresha nawe amutangire andi 6%. Guhera muri 2027, uyu musanzu uzakomeza kuzamurwaho 2% kugeza muri 2030, ugeze kuri 20%.
Umuyobozi Mukuru wa RSSB, Regis Rugemanshuro, yavuze ko guhera muri Mutarama ubwo umusanzu uzaba wongerewe, n’umushara wabajya muri pansiyo uzahita uzamurwa uhereye ku babona make. Kugeza uyu munsi abantu ibihumbi 60 bafata pansiyo, muri bo uwabonaga make kurusha abandi yahabwaga ibihumbi 13 Frw.
Minisitiri w’Imari n’Igenamigambi, Yusuf Murangwa yagaragaje ko u Rwanda aricyo gihugu cya Afurika cyatangaga umusanzu w’ubwiteganyirize muke ugereranyije n’ibindi. Ubwiyongere bw’umusanzu bugendana no kuba icyizere cyo kubaho cy’Abanyarwanda cyariyongereye, bityo igihe abari mu zabukuru bafata pansiyo kiriyongera.
Minisitiri Murangwa yabwiye abafite impungenge ko kutongera uyu musanzu, bizakomeza kugira ingaruka ku bafata pansiyo bahabwa amafaranga make.
Ati ” Ntabwo twirengagije ko bitoroshye, icyemezo nk’iki kiba gifite izindi ngaruka, ariko no kutagifata haba hari ingaruka ziremereye kurusha kugifata. Twakoze inama na PSF (Urugaga rw’Abikorera), turabyumvikana, dufata umwanzuro, hanyuma twemeranya guherekeza PSF mu kubishyira mu bikorwa.”
Abarebwa n’uyu mwanzuro wo kuzamura umusanzu w’ubwiteganyirize ni abakozi 9%, bafite imirimo yanditse basanzwe bishyura umusoro n’ibindi. Minisitiri Murangwa agaragaza ko hari abikorera bunguka n’abikorera batunguka, bityo iyi gahunda izashyirwa mu bikorwa n’ababishoboye, abatabishoboye nabo hakarebwa uburyo bafashwa.
