Minisiteri y’Ubuzima yatangaje ko habayeho ubwiyongere budasanzwe bw’indwara ya Malaria mu bice b’itandukanye by’igihugu, bwaturutse mu kuba imibu isigaye irumana hakiri kare ndetse n’ubwiyongere bw’aho imibu yororokera n’ibindi. Leta y’u Rwanda yashyizeho uburyo bushya bwo guhangana n’iyi ndwara burimo no gukoresha imiti mishya yunganira iyari isanzwe.
Minisitiri w’Ubuzima, Sabin Nsanzimana avuga ko indwara ya Malaria yiyongereye mu turere tumwe na tumwe turimo Kicukiro, Gasabo, Bugesera, Nyamagabe n’ahandi. Abaturage barakangurirwa kwirinda ibidendezi by’amazi n’ibihuru hafi y’ingo zabo kuko ari indiri y’imibu.
Akomeza agaragaza ko indwara ya Malaria iyo idakurikirwanywe vuba ishobora kuba yatwara ubuzima bw’umuntu mu gihe gito cyane, ati” Ni indwara bigaragara ko mu minsi itatu ugifatwa nayo, hatagize igikorwa ngo ipimwe ivurwe ishobora ndetse no gutera uburwayi bukomeye ikaba yahitana n’ubuzima bw’umuntu.”
Ikigo cy’Igihigu gishinzwe Ubuzima, RBC, cyatangaje ko mu rwego rwo gukomeza guhangana na Malaria ikomeje kwiyongera mu Rwanda hagiye gukoreshwa imiti mishya mu guhangana nayo, yunganira iyari isanzwe.
Ibi bishimangirwa na Dr. Mbituyumuremyi Aimable uyobora ishami rishinzwe kurwanya Malaria muri RBC, yabwiye RBA ko hari ingamba zafashwe mu kongera imiti ya Malaria yabaye mike ndetse n’indi ya ‘Coartem’ yari isanzwe ikoreshwa itakigaragaza ingufu mu guhangana nayo.
Imiti mishya igiye gukoreshwa yemewe n’Ishami rya Loni ryita ku Buzima, OMS, ifite izina rya ‘dihydroartemisinin-piperaquine: DHAP’ na ‘artesunate-pyronaridine: ASPY’.
Iyi miti mishya iratangira gutangwa kuri uyu wa mbere, tariki ya 6 Mutarama 2025, ikazaba yifashishwa mu kuvura abarwayi bafashe imiti ya mbere ariko ntibakize.
Imibare ya Minisitiri y’Ubuzima igaragaza ko kuva mu 2016- 2023, Malaria yari yaragabanutse ku kigero cya 90%, abarwayi bavuye kuri miliyoni 4,5 bagera ku bihumbi 620, mu gihe abicwaga nayo bavuye kuri 650 bakagera kuri 67.
Mu mwaka wa 2024, kuva muri Mutarama – Ukwakira, iyi ndwara yongeye kuzamuka ku kigero cya 45,8%, abarwayi bava kuri 432 bagera kuri 630. Ubu bwiyongere bwatewe nuko imibu isigaye irumana ku manywa, ubwiyongere bw’ahantu hororokera imibu, no kuba imiti yayivuraga yaracitse intege.
