Ikigo cya Habari Film Initiative ku bufatanye n’Umunyarwanda ukorera Televiziyo ya NBC ikomeye muri Leta Zunze Ubumwe z’Amerika, Jean-Bernard Rutagarama, bamaze imyaka itandatu bakora ibikorwa byo guhugura no kwigisha urubyiruko ibijyanye no gufata no gutunganya amashusho bifashishije ibikoresho kabuhariwe mu gukamera, bagamije kuzamura impano z’Abanyarwanda no guteza imbere uru ruganda mu Rwanda.
Uyu mwaka iki gikorwa cyatangiye ku wa mbere, tariki ya 15 Ukuboza-20 Ukuboza 2024, kitabiriwe n’urubyiruko rwiga ndetse rukora ibijyanye no gufata amashusho no kuyatunganya rurimo urwo muri IPRC Kigali, ADMA, n’ahandi, kiri kubera mu nyubako ya ICT Innovation, Kicukiro.
Mu kiganiro Umunota wagiranye n’umuyobozi wa Habari Film Initiative, Christian Gakombe, yadusobanuriye uko uyu mushinga yawutangije nyuma yo kubona ko hari ba mukerarugendo b’Abanyamahanga bagera mu Rwanda, bagakenera abanyamwuga babafatira amashusho meza, kandi nyamara hari urubyiruko rufite impano ariko rubura ubumenyi buhagije ngo rugere ku rwego rwo hejuru.
Yakomeje atubwira ko nyuma yo kugira iki gitekerezo yegereye Umunyarwanda Jean-Bernard Rutagarama, umaze imyaka 30 akora ibijyanye no gutunganya amashusho, ndetse kuri ubu akorera Televiziyo ya NBC yo muri Amerika, amusaba ko yasangiza ubumenyi afite abana b’Abanyarwanda, undi nawe amwemerera nta kiguzi amusabye.
Rutagarama wagiye muri Leta Zunze Ubumwe z’Amerika afite imyaka umunani yiyemeje gukorana na Habari Filim Initiative, dore ko buri mwaka iyo aje mu biruhuko mu mpera z’umwaka azana ibikoresho bishya, ndetse agatanga amahugurwa ku rubyiruko ku bijyanye no kubikoresha ndetse no gufata amashusho ari ku rwego mpuzamahanga.
Gakombe yadutangarije ko muri uyu mushinga umaze hafi imyaka itandatu kuko watangiye mu 2016, ndetse intego yawo ari ugutanga ubumenyi bwo gufata amashusho ari ku rwego mpuzamahanga, ndetse bahabwa n’ibikoresho bakigishwa n’uburyo bwo kubikoresha, bikababyarira inyungu.
Yagize ati” Umukobwa dufashe dushaka kumugira umukamezi (Camera Operator) ukomeye ku rwego mpuzamahanga, atari gusa ngo agarukire mu gufata amashusho y’inama cyangwa ikiriyo, nabyo ni byiza ariko tukamuha ubumenyi butuma abasha gufotora muri za pariki. Iyo ugiye kureba abanyamahanga baza ino mu Rwanda ntago baba baziko dufite Abanyarwanda bari ku rwego rwo gufata amashusho ari mpuzamahanga.”
Akomeza asobanura ko umwihariko w’iyi Initiative ari uko itanga ubumenyi n’ibikoresho ku buntu, ati” Iyo umunyamahanga aje gushaka umutekinisiye tuba dufite umuntu tumuha uzi gukoresha icyo gikoresho, akagifata neza, ndetse nawe akishyurwa akazamuka. Akenshi dusanga abandi batanga amahugurwa ku bijyanye no gufata amashusho na kamera bo icyo bareba ari inyungu, ntibabashe gukurikirana umunyeshuri.”
Jean-Bernard Rutagarama yavuze ko yatangiye iki gikorwa agamije kuzamura urwego Abanyarwanda bariho mu gufata amashusho yaba aya Televiziyo na Filime, ndetse asobanura ko Christian Gakombe yamugejeje igitekerezo yari afite agasanga gihura n’icye, ari nabwo umwaka wakurikiyeho mu 2016 yatangiye kuzana ibikoresho, batangiraga guhugura urubyiruko ku bijyanye no gukoresha kamera no gufata amashusho meza, ndetse umusaruro wabaye mwiza.
Ati” Umusaruro wabaye mwiza cyane kuko mu myaka tumaze dukora ibi, nabonye abanyeshuri banjye baba abanyamwuga mu gufata amashusho muri uru ruganda mu Rwanda, abandi bagiye mu bikorwa byo gutunganya filime, bahawe akazi ubu barakora bakabasha kwibeshaho, ibi bimpa umunezero mwinshi kubona batera imbere no kubona bafata bike nabigishije bakabihuriza hamwe n’ibyo biga kuri Youtube n’ubumenyi busanzwe, bigendana n’ubumenyi bwo gukoresha ibikoresho bikomeye. Njya mbasaba no kubyigisha bagenzi babo.”
Yakomeje avuga ko icyo yifuza ari uko yageza ubumenyi ku bantu benshi, bakabasha kuba abanyamwuga imbere n’inyuma ya kamera, bityo bizafasha mu kuzamura urwego rwa sinema mu Rwanda rube mpuzamahanga, ndetse bunguke n’ibindi bikoresho biri ku rwego rwo hejuru mu gufata amashusho, nk’imodoka zifashishwa muri iki gikorwa n’ibindi, kuko kugeza ubu ari ibikoresho bikurwa mu bindi bihugu iyo bikenewe mu Rwanda.
Bamwe mu bitabiriye aya mahugurwa bahamya ko ari amahugurwa ari kubagirira akamaro kuko bigiramo gukoresha ibikoresho nka Gimbal, Steady Camera, ndetse ibi bizabafasha ubwo bazaba bagiye mu kazi, nk’uko bisobanurwa na Nezerwa Gabriella, wiga ibijyanye na Cinematography muri IPRC Kigali.
Ati” Nk’ubu mbere y’uko nyazamo iyo hagira nk’umuntu umpa akazi ko kujya gukora video y’indirimbo, filime, ibintu byansaba gukoresha ibyo bikoresho, ntago nari kubyemera kuko ntago nari gushobora kubikoresha, kandi no mw’ishuri akenshi biba ari ukubyiga gusa mutabishyira mu bikorwa, cyangwa se mugakoresha ibikoresho bitari ibi, rero aya mahugurwa azampfungurira imiryango mu buzima bwanjye bw’ubunyamwuga.”
Abahugurwa babona ibikorwa nk’ibi byakongerwa mu gihugu kuko hari n’igihe usanga hari abamaze igihe mu mwuga ariko batangiye hataraza ibikoresho bikomeye, bityo nabo bakeneye guhugurwa kwikoreshwa ryabyo, kugirango ubwo bumenyi bajye babusangiza n’abandi bakizamuka.
AMAFOTO: Fils Pictures
