Mu Rwanda hateraniye inama yiga ku guteza imbere ubucuruzi, Africa Trade Development Forum (ATDF24), yitabiriwe n’abarenga 300, bari kurebera hamwe uko Isoko rya Afurika ryabyazwa umusaruro binyuze mu bucuruzi bukoresha ikoranabuhanga.
Iyi nama yatangiye kuri uyu wa mbere, tariki ya 2 Ukuboza 2024, iri kubera muri Kigali Marriot Hotel, yitabiriwe n’abarenga 300 barimo abahagarariye inzego za Leta, abikorera, sosiyete sivile n’abandi.
Inama ya ATDF24, yateguwe ku bufatanye n’Ikigo giharanira Iterambere ry’Ubucuruzi muri Afurika (TradeMark Africa), igamije kurebera hamwe uko Isoko rya Afurika ryabyazwa umusaruro binyuze mu guteza imbere ubucuruzi hifashishijwe ikoranabuhanga.
Minisitiri w’Ubucuruzi n’Inganda, Prudance Sebahizi yavuze ko u Rwanda rwishimye kwakira iyi nama, kuko ihuye na gahunda y’igihugu yo guteza imbere ubucuruzi mu karere hifashishijwe ikoranabuhanga.
Umuyobozi wa TradeMark Africa, Dave Beer yagaragaje ko ibi bizagerwaho binyuze mu bufatanye hagati ya Leta n’Abikorera, ati” Ntabwo ubucuruzi busaba ikoranabuhanga gusa, ahubwo ni abantu.”
Minisiteri y’Ubucuruzi n’Inganda mu Rwanda iherutse gutangaza ko u Rwanda rukeneye guhangana n’ikibazo cy’umusaruro muke, hakifashisha ikoranabuhanga mu kuwungera.
Iyi Minisiteri igaragaza ko hari uburyo umusaruro ushobora kwiyongera kandi Ubutaka butiyongere, umubare w’abakozi utiyongereye, ahubwo bigizwemo uruhare n’ikoranabuhanga.
Trade Mark Africa iri gukorana naza Guverinoma z’ibihugu bya Afurika, mu kuzamura isoko rusanjye ry’uyu mugabane ku buryo rizaguka rikagera no kuyindi Migabane, ariko bikaba ari ubucuruzi bukoreshejwe ikoranabuhanga ndetse butagira ingaruka mu kwangiza ibidukikije.
