Imyaka 10 irashize, Kosmotive Rwanda itangiye ibikorwa byo kwigisha no gufasha abagore n’abakobwa, mu kubaha amakuru ajyanye n’ubuzima bw’imyororokere, ndetse n’ibikoresho by’isuku birimo ibitambaro bikoreshwa mu gihe cy’imihango y’abagore ‘Kosmopads’, imyambaro y’abagore batwite n’abonsa n’ibindi.
Ku mugoroba wo ku wa kabiri, tariki ya 3 Ukuboza 2024, Kosmotive Rwanda yakoze ibirori bibereye ijisho byo kwizihiza imyaka icumi imaze itanga izi serivisi ku bagore n’abakobwa.
Ni ibirori byabereye mu mujyi wa Kigali, kuri Centre Culturel Francophone du Rwanda, byitabirwa n’abayobozi barimo Ambasaderi w’u Bufaransa mu Rwanda, Antoine Anfré, Umuyobozi mukuru wa Kosmotive Rwanda, Muziranenge Blandine, n’abandi bakozi n’abayobozi muri iki kigo.
Kosmotive Rwanda ni ikigo cyatangiye mu mwaka wa 2014, gishinzwe na Muziranenge Blandine. Intego yayo yari ugukemura ibibazo bibangamiye sosiyeti by’umwihariko abagore n’abakobwa, mu buryo bwo kubaha amakuru arebana n’ubuzima bw’imyororokere burimo imihango, kubyara n’ibindi.
Muziranenge yatubwiye ko mu myaka 10 ishize ubwo batangiraga uru rugendo, batangiranye n’ikinyamakuru kitwaga ‘Cosmos Magazine’, cyari gikubiyemo amakuru yigisha abagore by’umwihariko abatwite n’abonsa ibijyanye n’imibereho yaba iy’ubuzima bwo mu mutwe n’ubuzima busanzwe.
Mu mwaka wa 2016, biturutse mu guhura kenshi n’abagore batwite n’abonsa, batangiye kubakorera imyambaro, ndetse bamaze kubona umubare uri hejuru w’abagore n’abakobwa bahagarika imirimo yabo mu gihe bari mu mihango, batangira gukora ibikoresho by’isuku (Pads) zifite umwihariko wo gukoreshwa igihe kirekire no kutangiza ibidukikije.
Muziranenge yagize ati “Guturuka muri 2016, twatangiye gukora imyenda. Abantu twakoranaga kuri Magazine akenshi babaga batwite cyangwa bonsa, imyenda twatangiye dukora iya batwite n’abonsa, nyuma tumaze kubona imibare y’abakobwa basiba, abagore badashobora kujya ku kazi iyo bari mu mihango kubera batabasha kugura Pad, nibwo nagereranyije ibintu twari dufite muri icyo gihe, yari ibitambaro by’imyenda twari turi gukora, izi pads ziza muri 2018.”
Blandine asobanura ko batangira bakoraga umubare muto wa Pad, aho umuntu umwe yashoboraga gukora nka pads 20 ku munsi, biza kugeraho batangira gukorana ziba100, kuri ubu umubare wariyongereye cyane kuko ikipe y’abantu batanu bashobora gukora pads 1000 ku munsi.
Umwihariko w’izi Pads za ‘Cosmopads’ ni uko zikoreshwa igihe kirekire kigera mu myaka ibiri, igisabwa gusa ni ukuyisukura, aribyo kuyimesa neza, no kuyanika ku zuba. Ibi bifasha abazikoresha kwizigamira 80% ugereranyije n’amafaranga ya buri kwezi yo kugura pads zikoreshwa rimwe.
Cosmopads kandi ni igisubizo kubasanzwe bagirwaho ingaruka n’imiti iba iri muri Pads zisanzwe, kuko yo nta bindi bintu byongerwamo, ndetse zinafasha mu kurengera ibidukikije, kuko ntabwo ikoreshwa rimwe ngo isabe kujugunywa.
Muziranenge yakomeje asobanura ko bishimira ko izi pads bakora zakirwa neza ku isoko, ndetse atugaragariza ko mu myaka 10 hari ibyagiye birushaho kunozwa, ati” Kuva twatangira kugeza ubu uko zakiriwe ni byiza, ikintu twahinduye n’uko ama label yabaga ameze byagezaho birahinduka tugezaho dukuraho label burundu dutangira gukoresha ibitambaro byanditseho Cosmopads.”
Avuga ko kandi mu gutangira ubucuruzi bagurishaga ipaki yuzuye irimo eshanu, ariko bagiye baganira n’bantu bamwe bagaragaza ko bifuza kugura ariko batabasha kugeza ku giciro gihwanye n’umubare batanga, bityo bashobora kugurisha nk’ebyiri, umukiriya yabona amafaranga akagura izasigaye.
Nyirangirimana Annuarite ukorera Kosmotive Rwanda, ariko wayobotse gukoresha Cosmopads yishimira ko zamukijije guhangayika yibaza aho ari bukure amafaranga ya buri kwezi yo kugura Pads zisanzwe, ati” Amafaranga nagura Pads zisanzwe, ubu nyagura ibindi bintu ku ruhande, yenda nk’amakariso, kuba nayabika nkazareba ikindi kintu nyaguramo, birampfasha cyane.”
Akomeza avuga ko Cosmopads zigira uruhare mu kurengera ibidukikije kuko yo itajugunywa nk’izisanzwe, ahubwo isukurwa ikabikwa ikongera ikazakoreshwa, bituma idahinduka imyanda ngo ijugunywe aho ibonye ihure n’ibidukikije, bigatuma nabyo bikomeza kugira ubuzima bwiza.
Ambasaderi w’Ubufaransa mu Rwanda, Antoine Anfré, yashimiye Muziranenge Blandine ku gitekerezo cyiza cyo gutangiza Kosmotive Company, agaragaza ko yakozwe ku mutima n’urugendo rwe kuva mu 2014 uwo yatangizaga Cosmos Magazine, ndetse no kuba yarabashije kwaguka uyu munsi akaba yaratanze akazi ku bagera kuri 30, anashimangira ko ibikorwa bye byakwaguka bikagera no mu bindi bihugu byo mu karere.
Ati” Ndabashimiye cyane hamwe n’itsinda ryawe, ntekereza ko igihugu cy’u Rwanda gikeneye abantu benshi nkawe, bumva ko abantu bakeneye kubaho mu buzima bwiza, ukaba watangirira hasi, ugakoresha amafaranga yawe kugirango ukore ibikorwa bifitiye inyungu benshi, cyane cyane iyo utangiye ishoramari hari urwego uba uriho udafite abaterankunga. Icyo nkwifurije ni ugukomeza kwaguka ukagera ku rwego mpuzamahanga, ndetse ibikorwa byawe bikagukira no mu bihugu bituranye n’u Rwanda n’ahandi hose.”
Kosmotive Rwanda ifite intego yo kurandura burundu ikibazo cy’abagore bagisiba imirimo yabo mu minsi itanu y’ukwezi kuko bari mu mihango. Iki kibazo kiri kuri 18% bingana n’abagore bagera kuri miliyoni ebyiri, ibyo Muziranenge avuga ko muri uyu mubare bamaze kugera ku bihumbi 300 ndetse urugendo rugikomeje.
