Guverinoma y’u Rwanda yiyemeje kwishyura ingurane z’ubutaka bwubatswemo ibikorwaremezo ibereyemo abaturage, zingana na miliyari 21 Frw, bitarenze uyu mwaka wa 2025.
Ni ibyatangajwe kuri uyu wa Mbere, tariki ya 13 Mutarama 2025, n’Umunyamabanga wa Leta ushinzwe Ibikorwaremezo, Olivier Kabera, ubwo yari mu Nteko Ishinga Amategeko, Umutwe w’Abadepite.
Kabera yasubizaga ikibazo cyagaragajwe n’Urwego rw’Umuvunyi cy’uko habayemo gutinda kwishyura ingurane z’abaturage batanze ahubatswe ibikorwaremezo bitandukanye birimo imihanda, amazi, amapoto y’amashanyarazi.
Kabera yabwiye Abadepite ko ikibazo bakizi, ati “Turifuza gukora uko dushoboye kose kugira ngo uyu mwaka nibura 2025, uzasige bikemutse. Twifuza gushyiramo imbaraga kugira ngo dukemure ikibazo cy’ingurane n’ibindi bitandukanye.”
Yakomeje avuga ko n’andi mafaranga y’ibirarane Leta irimo nk’ubukode bw’ibiro byo gukoreramo n’ay’abafatanyabikorwa, yose azishyurwa.
Kabera yagaragaje ko mu mwaka w’ingengo y’imari 2024/2025, hari amadosiye ibihumbi 20 agomba guhabwa ingurane ingana na miliyari 6,8 ariko ayishyuwe ni miliyari 1,8 Frw.
Yongeye kugaragaza kandi ko zimwe mu mbogamizi bakunze guhura na zo ari uko hari igihe abaturage bimurwa badafite ibyangombwa by’umutekano byuzuye ndetse no kuba hari igihe Leta itangira umushinga hataraboneka amafaranga akwiye.
Mu mwaka wa 2024, Umuvunyi Mukuru Nirere Madeleine yagaragaje ko amafaranga y’ingurane y’abaturage yari miliyari 15.8, nyuma y’umwaka arazamuka agera kuri miliyari 21 Frw.
