Umuhuzabikorwa w’amashami ya Loni mu Rwanda, Ozonnia Ojielo, yashimiye Leta y’u Rwanda uburyo yakiriye ikanafasha abakozi bayo bakoreraga mu Mujyi wa Goma, mu Burasirazuba bwa Repubulika Iharanira Demokarasi ya Congo, ubwo bari bahunze imirwano yahuje M23 n’ingabo z’icyo gihugu, FARDC.
Ni ibyo yagarutseho ku wa Kabiri, tariki ya 28 Mutarama 2025, mu kiganiro yagiranye n’itangazamakuru, asobanura ko inzego za Loni zohereje ubusabe ku Rwanda ko rwakwemera kwakira abakozi bayo n’imiryango yabo, mbere y’uko bakomeza i Kinshasa.
Yagize ati “Ubwo busabe bwakiriwe saa 13:25 z’igitondo (Ku wa 27 Mutarama 2025). Nyuma y’iminota 15 ubwo busabe bwakiriwe na Guverinoma y’u Rwanda, nakiriye ubutumwa bubyemera. Ikintu nshimira cyane n’uburyo basuzumye ubwo busabe byihuse cyane, kandi ntabwo Guverinoma y’u Rwanda yemeye ubwo busabe gusa, yahise itangira gukorana natwe mu buryo bwihuse.
Yakomeje avuga ko mu gitondo cyo ku wa Mbere, ubwo M23 yari imeze nk’iyafashe Umujyi wa Goma, gahunda yo kwakira abakozi ba Loni ku mupaka uhuza RDC na Rubavu yakurikiranywe n’u Rwanda, ndetse rubamenyera uburyo bw’ingendo zigera i Kigali, nta kibazo kibayemo.
Ati “Nari i Rubavu, ariko imbaraga zo kwakira aba bakozi ba Loni zari ziyobowe na Guverinoma y’u Rwanda. Inzego z’ingenzi za Guverinoma y’u Rwanda zari zihagarariwe. Abakozi ba Loni babashije kwinjira mu Rwanda mu gitondo, ibyangombwa byabo birasuzumwa, ubundi binjira muri bisi ziberekeza i Kigali. Bahise bazanwa kuri Kigali Pelé Stadium. Hari gahunda iteguye neza, inzego zose zari zihari zifasha aba bakozi zari zihari.”
Akomeza avuga ko abakozi ba Loni bakiriwe mu Rwanda bahawe hoteli zo kuraramo n’ibyo kurya, babifashijwe n’Ikigo cy’Igihugu Gishinzwe Guteza Imbere Ubukerarugendo Bushingiye ku Nama (RCB), ndetse ahamya ko Guverinoma y’u Rwanda ifatanyije n’Abakozi ba Loni bavuye kuri Kigali Pele Stadium ari uko abantu bose babonye ubufasha.
Ozonnia Ojielo yashimiye Leta y’u Rwanda ku bufasha yatanze mu kwakira no kwita byihariye ku bakozi ba Loni.
Ati “Mu izina ry’Umuryango w’Abibumbye mu Rwanda, ndashaka gushimira cyane Guverinoma y’u Rwanda. Urwego rwo kwakira abakozi ba Loni, uburyo bw’imyiteguro no gufashwa, byari biri ku rwego rwo hejuru. Inzego zose zabigizemo uruhare, bikorwa neza cyane, abantu bagezwa kuri hoteli mu buryo bwihuse.
Abakozi ba Loni bakiriwe n’u Rwanda, ku wa Mbere, bahunze imirwano iri mu Mujyi wa Goma bagera ku 1832, biteganyijwe ko bazava mu Mujyi wa Kigali, berekeza i Kinshasa muri RDC, kuko bose ari abaturage ba Congo.
Kugeza ubu hari Abanye-Congo benshi bahungiye mu Rwanda kuva mu minsi ishize hari intambara i Goma, ariko benshi muri bo ntaho banditse, kuko binjiye mu gihugu bajya mu miryango bahafite, abandi bajyana n’imiryango yabo mu mahoteli.
Imibare y’abanye-Congo bemerwa nk’impunzi binjiye mu Rwanda igaragaza ko ari bake, abo bose kugeza ubu baracyari gukurikiranwa na Minisiteri Ishinzwe Ibikorwa by’Ubutabazi, MINEMA.
