Madamu Jeannette Kagame ari i Doha muri Qatar, aho yitabiriye Inama Mpuzamahanga yiga ku iterambere ry’Umuryango izwi nka ‘International Year of the Family’.
Madamu Jeannette Kagame yageze i Doha kuwa kabiri tariki ya 29 Ukwakira 2024, akaba yitabiriye inama yatangiye kuri uyu wa gatatu, tariki ya 30-31 Ukwakira 2024.
Ku ruhande rw’u Rwanda ari kumwe na Minisitiri w’Uburinganire n’Iterambere ry’Umuryango, Uwimana Consolée, ndetse akaba ari inama yitabiriwe n’abarenga 2000 bashinzwe umuryango mu bihugu 80.
Biteganyijwe ko Madamu Jeannette Kagame azatanga ikiganiro ku munsi wa kabiri w’inama cyiswe ’Breaking the Cycle: Overcoming the Poverty Trap’, kizaba kigaruka ku bibazo byugarije umuryango birimo ingaruka zo gushyingira abana batujuje imyaka y’ubukure, impamvu itera ababyeyi kubashyingira, ingamba zashyizweho mu kubirwanya n’ibindi.
Madamu Jeannette Kagame ni umwe mu bashyize imbere gahunda yo guteza imbere umuryango abinyujije mu Muryango yashinze witwa ‘Imbuto Foundation’, uteza imbere uburezi, ubuzima n’imibereho myiza yibanda mu baturuka mu miryango itishoboye.
Akomeza agaragaza ko iyi nama yitabiriye igendanye na gahunda yo guteza imbere umuryango u Rwanda rwihaye.
Ati” Insanganyamatsiko y’iyi nama ihuye neza na gahunda u Rwanda rwihaye y’iterambere rishingiye ku miryango. Twishimiye kuyitabira kugira ngo tuganire kandi twigire ku bandi kuko ubufatanye mpuzamahanga ari ingenzi kugira ngo tugere ku Ntego z’Iterambere Rirambye.”
Ubuyobozi bw’Ikigo ’Doha International Family Institute’ cyateguye iyi nama, bwagaragaje ko bwishimiye kubana na Madamu Jeannette Kagame, ndetse bwiteguye kumva inzira u Rwanda rwanyuzemo ngo rugere ku iterambere ry’umuryango.
Iyi nama yatangijwe na Loni mu 1994 hagamijwe kwita ku muryango nk’umusingi w’iterambere rirambye ku Isi, ndetse no kurebera hamwe ibiwuhungabanya.
